2018-ᒥ ᓄᓇᕕᒻᒥ ᐯᕆᑦᓯᕖᑦ ᐱᓇᓱᐊᕈᓯᖓ ᔫᓂ 4-ᒥᑦ 8-ᒧᑦ
ᓄᓇᕕᒻᒥ ᐯᕆᑦᓯᕖᑦ ᐱᓇᓱᐊᕈᖕᓯᖓ ᓇᓪᓕᐅᑎᓯᒪᓛᕐᒪᑦ ᔫᓂ 4-ᒥᑦ 8-ᒧᑦ, ᓇᑯᕐᓴᓂᑦᑎᓂᒃ ᐃᓘᓐᓇᑕ ᑕᑯᑦᓴᐅᑎᑦᓯᒋᐊᖃᓛᕐᑐᒍᑦ ᐱᒋᐅᕐᓴᑎᑦᓯᔨᖏᓐᓂᒃ ᐊᒻᒪᓗ ᐱᓇᓱᑦᑎᖏᓐᓂᒃ ᐯᕆᑦᓯᕖᑦ. ᕿᑐᕐᖓᑕ ᐃᓅᓯᖏᓐᓂ ᑖᒃᑯᐊ ᐱᒻᒪᕆᑎᒍᑦ ᐃᓚᐅᒻᒪᑕ, ᐃᓕᓭᑦᓱᑎᒃ, ᓇᓪᓕᒍᓱᑦᓱᑎᒃ ᐊᒻᒪᓗ ᑲᒪᒋᔭᖃᑦᓯᐊᓱᑎᒃ ᕿᑐᕐᖓᑎᓐᓂᒃ. ᓯᕐᓚᐅᓃᑦ ᐃᓘᓐᓇᑕ ᑐᓴᕐᑎᓯᑦᓯᐊᖃᑦᑕᓛᕐᖁᒍᑦ ᕿᑐᕐᖓᑕ ᐱᒋᐅᕐᓴᑎᑦᓯᔨᖏᓐᓂᒃ ᐊᒻᒪᓗ ᐱᓇᓱᑦᑎᓂᒃ ᐊᓕᐊᒋᒻᒪᕆᑦᓱᒋᑦ ᓇᑯᕐᒦᓂᑦᑎᓂᒃ!
ᑯᑦᔪᐊᕌᐱᒃ
ᑰᑦᔪᐊᖅ
ᐯᕆᑦᓯᕕᓐᓂ ᐱᒋᐅᕐᓴᑎᑦᓯᔩᑦ - ᐃᓕᓐᓂᐊᓂᖓ
ᐯᕆᑦᓯᕕᓐᓂ ᐱᒋᐅᕐᓴᑎᑦᓯᔩᑦ ᓄᓇᕕᒻᒥ ᓄᓇᓕᓐᓂ ᐃᓘᓐᓀᓂ ᐱᓯᒪᔪᑦ ᐅᓪᓗᓂ ᐱᖓᓱᓂ ᐃᓕᓐᓂᐊᑎᑕᐅᓂᖃᓚᐅᔫᑦ ᑲᔪᓯᑎᑕᖓᓂ ᑫᐋᔨᑉ ᐯᕆᑦᓯᕕᓕᕆᕕᖓ ᑰᑦᔪᐊᒥ ᒫᑦᓯ 20-ᒥᑦ 22-ᒧᑦ, 2018-ᒥ. ᐅᓪᓗᓂ ᐱᖓᓱᓂ ᐊᑦᔨᒌᖕᖏᑐᑦ ᐃᓕᓐᓂᐊᑎᑦᓯᒍᑏᑦ ᒪᓂᒪᔭᐅᓚᐅᔫᑦ ᐊᑦᔨᒌᖕᖏᑐᑦ ᐃᓕᓐᓂᐊᑎᑦᓯᐅᑕᐅᑎᓪᓗᒋᑦ. ᐁᑉᐱᑐᓂ, ᐁᒥ ᐋᓕ ᑎᒥᒥᑦ ᐱᓯᒪᔪᑦ ᐊᕐᓱᕈᓐᓇᑐᓂᒃ ᐱᓚᕿᑎᑦᓯᑌᓕᓂᕐᓄᑦ ᐱᓇᓱᕝᕕᒥᑦ ᑲᔪᓯᑎᑦᓯᓚᐅᔫᖅ ᑎᒥᖁᑎᖓᑕ ᐃᓕᓐᓂᐊᑎᑦᓯᐅᑎᖓᓂᒃ ᐱᓗᑲᕝᕕᖃᕈᓐᓀᓗᓂ ᐊᕐᓱᕈᓐᓇᑐᒃᑰᑎᑦᓯᑌᓕᓂᕐᓄᑦ. ᐱᖓᑦᓯᑐᓂ, ᒥᐊᔨ ᔪᐋᓐ ᐊᐅᒃᑫ ᑲᔪᓯᑎᑦᓯᓚᐅᔫᖅ ᖃᓪᓗᓈᑦ ᐱᐅᓯᖏᓐᓂᒃ ᐱᐅᓯᕐᑖᑕᐅᓯᒪᐅᑎᓂᒃ ᒧᒥᑦᑎᓯᓂᕐᒧᑦ ᐆᑦᑐᕋᕈᑎᒥᒃ ᐊᒻᒪᓗ ᐱᒋᐅᕐᓴᑎᑦᓯᔩᑦ ᐱᕕᖃᕐᑎᑕᐅᓚᐅᔪᑦᓱᑎᒃ ᐅᖄᒍᓐᓇᓱᑎᒃ ᐊᑑᑎᓯᒪᔭᒥᓂᒃ ᐅᓂᒃᑲᐅᓯᑦᓴᒥᓂᓪᓗ ᐃᓄᓐᓄᑦ ᐊᕐᓇᓄᑦ ᐊᒻᒪᓗ ᐱᒋᐅᕐᓴᑎᑦᓯᔨᓄᑦ. ᑭᖑᓪᓕᐹᒥ ᓯᑕᒻᒥᑐᓂ, ᐹᑕᕆᒃ ᐃᐊᕙᓐᔅ ᐊᒻᒪᓗ ᕕᒃᑐ ᐱᐊᕐᓇᐅᑕᓐ Université du Québec à Montréal-ᒥᑦ ᐱᓯᒪᔫᒃ ᑕᑯᔭᐅᑎᑦᓯᓚᐅᔫᒃ ᓄᑖᓂᒃ ᓴᓇᖕᖑᐊᒉᑦ ᐋᕐᕿᓱᕐᓯᒪᔭᒥᓂᒃ ᐱᒍᑦᔨᓱᒋᑦ ᓄᓇᕕᒻᒥᐅᑦ ᑲᒃᑲᓛᑦ ᐱᖕᖑᐊᓕᐅᕈᑦᔨᓱᒋᑦ.
ᓄᑖᖅ ᐯᕆᑦᓯᕖᑦ ᐊᐅᓚᑕᐅᒍᓯᖏᓐᓂᒃ ᐃᓕᓐᓂᐊᑎᑦᓯᓂᖅ
ᐊᓪᓕᕇᕐᑐᓂ, ᕕᕗᐊᔨ 12, 2018-ᒥ, 14 ᐯᕆᑦᓯᕖᑦ ᓄᓇᕕᓕᒫᒥ ᑲᒪᔨᒻᒪᕆᖏᑦ ᑰᑦᔪᐊᒦᓚᐅᔫᑦ ᐱᒋᐊᕐᑎᑕᐅᑎᓪᓗᒍ ᓄᓇᓕᓐᓂᒃ ᑐᖕᖓᕕᓕᒃ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᒐᖅ ᐊᑎᓕᒃ ᐯᕆᑦᓯᕖᑦ ᐊᐅᓚᑕᐅᒍᓯᖏᑦ. ᑲᑎᑦᓱᑎᒃ 22 ᐃᓚᐅᓚᐅᔫᑦ ᐱᓇᓱᒐᐅᑉ ᐱᒋᐊᕐᕕᖓᓂ ᐱᓇᓱᐊᕈᓯᕐᒥ ᓯᕗᓪᓕᐹᒥ. ᐱᓇᓱᖕᒐᖅ ᑲᒪᔨᒻᒪᕆᓐᓂᒃ ᐃᓕᑦᓯᓕᐅᒥᑎᑦᓯᔪᑦᓴᖅ ᑐᓴᐅᒪᐅᑎᖃᑎᖃᑦᓯᐊᓂᕐᓂᒃ, ᓯᕗᓕᕐᑎᐅᓂᕐᓂᒃ, ᐊᐅᓚᑦᓯᔨᐅᓂᕐᓄᑦ ᐱᓇᓱᒐᖏᓐᓂᒃ, ᐊᒻᒪᓗ ᖃᓄᖅ ᓄᐃᑕᓂᕐᓴᐅᑎᑕᐅᒍᓐᓇᒪᖔᑦ ᐃᓄᐃᑦ ᐃᓗᒡᒍᓯᖓ ᐯᕆᑦᓯᕕᓐᓂ.
ᐱᓇᓱᒐᖅ ᐸᕐᓀᑕᐅᓯᒪᔪᖅ ᑲᔪᓯᓚᖓᑎᓪᓗᒍ ᐊᕐᕌᒎᒃ ᒪᕐᕉᒃ ᐃᑭᓐᓂᓴᓂ ᐱᔭᕇᕐᑕᐅᒋᐊᖃᖃᑦᑕᓂᐊᕐᒪᑕ ᐱᓇᓱᐊᕈᓯᕐᑐᑐᑦ ᐃᓕᓐᓂᐊᑎᑦᓯᒍᑏᑦ ᑲᔪᓯᑎᑕᐅᒍᑎᖏᑦ ᑐᖓᓕᕇᑦ ᐱᖓᓲᔪᕐᑐᑦ ᐱᓇᓱᐊᕈᓰᑦ ᐊᓂᒍᕐᐸᑕ ᑕᒫᑦ ᑲᔪᓯᒋᐊᓪᓚᖃᑦᑕᓗᑎᒃ. ᐱᓇᓱᐊᕈᓯᕐᒥ ᐊᑕᐅᓯᕐᒥ ᐃᓘᓐᓀᓂ ᐃᓕᓐᓂᐊᑎᑦᓯᓂᖃᖃᑦᑕᑎᓪᓗᒍ ᓄᓇᓕᓐᓂ ᑖᒃᑯᓇᓂᑦᓭᓇᐅᖕᖏᑐᖅ. ᑲᔪᓯᓂᖃᑦᓯᐊᑐᑦ ᐃᓕᓴᕐᓂᒥᒃ ᐱᔭᕇᑦᓯᐊᓗᑎᒃ ᐱᓇᓱᒐᐅᑉ ᐃᓱᐊᓂ ᐁᑦᑐᑕᐅᓛᕐᑎᓗᒋᑦ ᐱᓇᓱᒐᕐᒥᓄᑦ ᐃᓕᓴᕐᓂᒥᒃ ᐊᓂᒍᐃᓯᒪᒋᐊᖏᑦ ᓇᓗᓀᕐᑕᐅᒍᑎᓂᒃ.
ᐊᐅᓚᑦᓯᓂᕐᓄᑦ ᐯᕆᑦᓯᕕᓐᓂᒃ ᐱᓇᓱᒐᖅ ᓄᐃᑕᐅᓯᒪᔪᑦ CEGEP de Saint-Félicien-ᒧᑦ ᓴᐳᑦᔭᐅᓂᖃᕐᓱᑎᒃ ᐊᒥᓱᐃᓄᑦ ᐃᑲᔪᕐᑎᓄᑦ, ᐃᓚᐅᑎᓪᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᑲᑎᕕᒃ ᐃᓕᓴᕐᓂᓕᕆᓂᖅ, ᐊᓪᓓᑦ ᑯᔩᑦ ᑲᕙᒪᖓ, ᐊᒻᒪᓗ ᓄᓇᓕᑐᖃᑦᓴᔦᑦ ᑯᐯᒻᒥ ᐊᒻᒪᓗ ᓛᐸᑐᐊᒥ ᐃᓗᓯᕐᓱᓂᕐᓄᑦ ᐊᒻᒪᓗ ᐃᓅᓕᓯᕆᓂᕐᓄᑦ ᑭᒡᒐᑐᕐᑏᑦ.
ᐯᕆᑦᓯᕕᓐᓂ ᐃᓕᓐᓂᐊᑎᑦᓯᓃᑦ ᐱᐅᓂᖏᑦ - ᑲᑎᒪᐅᑎᖃᕐᓂᖅ
ᑲᑎᒪᓂᕐᒥ ᐊᓪᓕᕇᕐᑐᓂ, ᑎᓯᒻᐱᕆ 4, 2017-ᒥ, ᔫᓕ-ᐋᓐ ᐴᑎ ᐊᒻᒪᓗ ᒪᕇᔅ ᑐᑲᑦ ᑫᐋᔩᑉ ᐯᕆᑦᓯᕕᓕᕆᕕᖓᓃᑦᑑᒃ ᑐᓂᔨᓚᐅᔫᒃ ᐃᓚᒌᓄᑦ ᑐᕐᖃᑕᕐᕕᒧᑦ, ᑫᐊᔩᑉ ᑐᑭᓯᑎᑦᓯᒍᑎᖏᓐᓂᒃ ᐱᖁᔭᖅ 143-ᒧᐊᖓᔪᓂᒃ, ᐱᖁᔭᖅ ᐱᐅᓴᕐᑕᐅᓂᖏᓐᓄᑦ ᐃᓕᓐᓂᐊᑎᑦᓯᐅᑏᑦ ᐊᒻᒪᓗ ᐱᕙᓪᓕᔭᐅᒋᐊᕐᓂᖏᓐᓄᑦ ᓈᒻᒪᒋᐅᑕᐅᔪᑦ ᐱᕙᓪᓕᐊᑎᑕᐅᓂᖏᑦᑕ ᐃᓕᓐᓂᐊᑎᑦᓯᓃᑦ ᐯᕆᑦᓯᕕᑎᒍᑦ ᑭᒡᒐᑐᕈᑏᑦ. ᑲᑎᒪᐅᑎᖃᓚᐅᕐᑐᑦ ᑫᐋᔩᑉ ᑭᒡᒐᑐᕐᑎᒋᒃ ᑐᑭᓯᑎᑦᓯᒋᐊᕐᑎᓗᒋᒃ ᑎᒥᐅᑉ ᐅᖃᐅᓯᑦᓴᖏᓐᓂᒃ ᐊᒻᒪᓗ ᖃᓄᐃᓕᖓᖁᔨᐅᑎᒥᓂᒃ. ᑐᕐᖃᑕᕐᕕᓗ, ᐃᒣᑦᑐᓂᒃ ᓂᕆᐅᓐᓇᓚᖓᑎᓪᓗᒋᑦ ᐅᖃᐅᓯᖃᓚᐅᕐᑐᖅ:
- ᑫᐋᔩ ᑐᑭᓯᓂᐊᕐᑕᐅᓛᕐᑐᖅ ᐋᕐᕿᓱᐃᓯᒪᓂᕐᓄᑦ ᓴᓇᕐᕈᑎᓄᑦ ᐊᑐᕐᑕᐅᔪᑦᓴᓄᑦ ᓄᓇᕕᒻᒥ ᐯᕆᑦᓯᕕᓐᓂ ᖃᐅᔨᓴᕐᑕᐅᓂᖏᓐᓄᑦ ᐊᒻᒪᓗ ᐱᐅᓴᕐᑕᐅᓂᖏᓐᓄᑦ ᐃᓕᓐᓂᐊᑎᑦᓯᓯᐊᕈᑎᑦᓭᑦ ᐯᕆᑦᓯᕕᓐᓂ;
- ᑫᐋᔩ ᐱᒐᓱᐊᕈᓐᓇᓚᖓᔪᖅ ᓄᓇᓕᓕᒫᓂ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᒐᕐᒥᑕ ᐃᓕᑕᕆᔭᐅᓂᕐᑖᑕᐅᓂᖓᓂᒃ ᐯᕆᑦᓯᕕᓐᓂ ᐱᕙᓪᓕᑎᒋᐊᕐᓗᒋᑦ ᐃᓱᕐᕆᓇᕈᓐᓇᓂᖏᑦ ᑲᒃᑲᓛᑦ ᐯᕆᑦᓯᕕᒻᒥ ᐱᓗᑎᒃ ᐃᓕᓴᕐᕕᓄᑦ ᑲᔪᓯᒍᓐᓇᓯᐊᕈᓐᓇᐅᑎᖏᑦ;
- ᓄᓇᖃᕐᖄᑐᕕᓃᑦ ᓄᓇᓖᑦ ᐋᕐᕿᑕᐅᓯᒪᐅᑎᓂᒃ ᒪᓕᒋᐊᖃᕋᔭᖕᖏᑐᑦ ᐃᓕᓐᓂᐊᑎᑦᓯᓂᕐᓄᑦ ᐯᕆᑦᓯᕕᓐᓂ ᐱᖁᔭᐅᑉ ᐊᑖᓂ ᐱᑦᔪᑎᓕᓐᓂᒃ ᑲᕙᒪᒃᑯᑦ ᓯᑯᑦᓴᔭᖁᑎᖏᓐᓂᒃ ᐁᑦᑐᑕᐅᓯᒪᓗᑎᒃ ᑭᓯᐊᓂᐅᒍᑎᓂᒃ;
- ᐯᕆᑦᓯᕕᖁᑎᓖᑦ ᐃᓕᑕᕆᔭᐅᓂᖃᖕᖏᑐᓂᒃ ᑲᔪᓯᑎᑦᓯᒍᓐᓇᕋᔭᕐᑐᑦ ᑭᒡᒐᑐᕐᓂᓂᒃ ᒪᓂᔨᓯᒪᐅᑎᒥᓂᒃ ᑎᑭᓪᓗᒋᑦ ᐱᖓᓲᔪᕐᑐᑦ ᑲᒃᑲᓛᑦ ᖃᓄᐃᓕᔭᐅᒍᑕᐅᒍᓐᓇᑐᑦ ᓯᐊᒃᓴᓐ 6.1-ᖓᓃᑦᑐᓄᑦ ᐋᕐᕿᒋᐊᕐᑕᐅᓯᒪᔫᑉ ᐱᖁᔭᐅᑉ.
ᑲᑎᒪᓂᓕᒫᒥᓂ, ᑐᕐᖃᑕᕐᕕᒃ ᑕᑯᓐᓇᑎᑦᓯᓯᐊᓚᐅᕐᑐᖅ ᐃᑉᐱᒋᔭᖃᑦᓯᐊᕈᒪᓂᕐᒥᓂᒃ ᐊᒻᒪᓗ ᐅᒃᑯᐃᖔᕐᕕᖃᕐᓂᒥᓂᒃ ᑭᒡᒐᑐᕈᑎᐅᕙᑦᑐᓂᒃ ᐯᕆᑦᓯᕕᓐᓂ ᓄᓇᕕᒻᒥ. ᑫᐋᔩᑉ ᑭᒡᒐᑐᕐᑎᖏᑦ ᑐᖕᖓᓱᑦᑎᓯᓚᐅᕐᑐᑦ ᑐᕐᖃᑕᕐᕕᒥᒃ ᓄᓇᕕᓕᐊᕈᓐᓇᓂᕋᕐᓱᒍ ᖃᐅᔨᒋᐊᓪᓚᕆᐊᕐᑐᓗᓂ ᑕᒪᒃᑯᓂᖓ.
ᑕᑯᒐᓱᐊᕐᑕᐅᒍᓐᓇᑐᑦ ᑫᐋᔩᑉ ᑐᑭᓯᑎᑦᓯᐅᑎᖏᑦ ᐱᖁᔭᖅ 143-ᒧᐊᖓᔪᓂᒃ (PDF, ᖃᓪᓗᓈᑎᑐᕐᑐᑦ ᑭᓯᐊᓂ).
2017-ᒥ ᑲᒃᑲᓛᕌᐱᓐᓂᒃ ᐯᕆᑦᓯᕕᒻᒥ ᐱᒋᐅᕐᓴᑎᑦᓯᔩᑦ ᐃᓕᓴᕐᓂᒥᒃ ᐱᔭᕇᕐᑐᑦ
ᐊᐅᔭᖅ, ᑲᑎᑦᓱᑎᒃ 25 ᐯᕆᑦᓯᕕᒻᒦᑐᓂᒃ ᐱᒋᐅᕐᓴᑎᑦᓯᔩᑦ ᐃᕗᔨᕕᒻᒥ, ᐃᓄᑦᔪᐊᒥ ᐊᒻᒪᓗ ᑰᑦᔪᐊᒥ ᐱᔪᓐᓇᐅᑎᑖᓚᐅᕐᑐᑦ ᐱᓇᓱᐊᕆᐅᕐᓴᓂᕐᒧᑦ ᐃᓕᓴᕐᓂᒥᓄᑦ ᐱᒋᐅᕐᓴᑎᑦᓯᔨᐅᓂᕐᒧᑦ ᓄᓇᖃᕐᖄᑐᕕᕐᓂᓂ ᐊᒻᒪᓗ ᐃᓄᓐᓂ ᐯᕆᑦᓯᕕᓐᓂ ᑭᒡᒐᑐᕐᓂᓄᑦ. ᐊᓕᐊᒍᑦᔨᔪᒍᑦ ᐃᓘᓐᓀᓂᒃ ᐊᓂᒍᐃᓯᒪᓕᕐᑐᓂᒃ!
ᓄᓇᓕᓐᓂ ᐸᕐᓀᑕᐅᓯᒪᓲᑦ ᐃᓕᓐᓂᐊᑎᑕᐅᓂᖏᑦ ᐃᓄᑦᑎᑐᑦ ᐯᕆᑦᓯᕕᓐᓂ ᐯᕆᑦᓯᔩᑦ ᑲᔪᓯᓂᓕᒻᒥᒃ ᐅᐃᒪᓇᕐᑐᖁᑎᒋᔭᐅᔪᑦ ᑫᐋᔩᑉ ᐯᕆᑦᓯᕕᓂᓕᕆᕕᖓᓂ. ᑖᓐᓇ ᓄᑖᖅ ᓱᕐᖁᐃᓯᑎᑦᓯᒍᑎᑦᑕᓕᒃ ᐱᓇᓱᐊᕆᐅᕐᑐᓂᒃ ᐃᓕᓭᓂᕐᓄᑦ ᐱᓇᓱᒐᖅ ᒪᓂᒪᔭᐅᓲᖅ ᐃᑲᔪᕐᑎᓗᒋᑦ ᓯᔨᐊᑉ ᓭᓐᑦ-ᕕᓕᓯᐊ (CEGEP de Saint-Félicien) ᐊᒻᒪᓗ ᐱᒋᐅᕐᓴᑎᑦᓯᔨᓂᒃ ᑲᔪᓯᒍᓐᓇᑎᑦᓯᒍᑕᐅᑦᓱᓂ ᐱᓇᓱᐊᕐᓂᒥᓂᒃ ᐃᓕᓐᓂᐊᑎᑕᐅᓂᕐᒥᓂ, ᐱᕙᓪᓕᑕᐅᓂᖃᓚᖓᑎᓪᓗᒋᑦ ᐯᕆᑦᓯᕖᑦ ᐊᒻᒪᓗ ᐱᓇᓱᑦᑎᖏᑦ. ᐊᓂᒍᐃᑦᓯᐊᑐᑦ ᐃᓕᓴᕐᓂᒥᒃ ᒪᓂᔭᐅᓲᑦ ᐃᓕᑕᕆᔭᐅᓪᓚᕆᐅᑎᑖᕈᑎᒥᒃ ᐃᓚᐅᔪᑦ ᐁᑦᑐᑕᐅᑎᓗᒋᑦ ᓇᓗᓀᕐᑕᐅᓯᒪᐅᑎᒥᒃ ᐱᒋᐅᕐᓴᑐᑦᓯᔨᓪᓚᕆᐅᓕᕆᐊᖏᑦ ᑯᐯᒻᒥ.
ᑰᑦᔪᐊᖅ (ᓴᐅᒥᒻᒥᑦ ᑕᓕᕐᐱᒧᑦ): ᓛᕆᓴ ᐋᓇᓈᒃ, ᓗᐃᓴ ᓵᓐᑕ, ᔨᐊᓯ ᐋᕐᒪ, ᓵᓇ ᑯᐊᑕ, ᒥᐊᔨ ᓵᓐᑕ, ᓰᓚ ᐴᑎ, ᓖᐊᓇ ᑯᔦᒃ, ᕕᓂ ᓯᕐᖁᐊᓗᒃ, ᐹᓴ ᒪᓂᒃ-ᑎᓅᓪᑦ, ᓰᐸ ᓵᓐᑕ, ᓯᐊᔭ ᐸᕐᓲᑦ-ᒣ ᐊᒻᒪᓗ ᓵᓐᑐᔭ ᓰᓪᔅ.
ᐃᕗᔨᕕᒃ (ᓴᐅᒥᒻᒥᑦ ᑕᓕᕐᐱᒧᑦ): ᓘᓯ ᐃᙯᑦᑐᒃ, ᕉᑕ ᒪᖏᐅᖅ, ᓲᓴᓐ ᒫᑦ-ᕿᓗᖅ- ᓖᑎᐊ ᐅᕿᑦᑐᖅ, ᔪᐃᔅ ᑯᒃ (ᐃᓕᓭᔨ), ᒫᑭ ᐅᓱᐊᕐᔪᒃ, ᒫᑦ ᐅᓱᐊᕐᔪᒃ ᐊᒻᒪᓗ ᕉᑕ ᐅᕿᑦᑐᖅ.
ᐃᓄᒃᔪᐊᖅ (ᓴᐅᒥᒻᒥᑦ ᑕᓕᕐᐱᒧᑦ): ᓯᐊᔭ ᓵᒥᓵᒃ, ᒫᔨ ᐳᑐᓕᒃ (ᐃᓕᓭᔨ), ᐃᓕᓴᐱ ᓇᐹᕐᑐᖅ, ᐋᓚᔅ ᐅᐃᑖᓗᑦᑐᖅ, ᒫᓖᓐ ᑕᒃᑲᑕᒃ, ᑌᓇ ᐃᖃᓗᒃ-ᑕᒃᑲᑕᒃ ᐊᒻᒪᓗ ᐃᓕᓴᐱ ᐅᐃᑖᓗᑦᑐᖅ.
