ᓄᓇᕕᒻᒥ
ᐯᕆᑦᓯᕕᓕᕆᓂᖅ

ᒫᑦᔨ 9, 2020 ᐱᓇᓱᐊᕈᓯᖓᓂ, ᑲᒪᔨᒻᒪᕇᑦ ᐯᕆᑦᓯᕕᓐᓂ ᓄᓇᕕᒻᒥ ᑰᒃᔪᐊᓕᐊᕐᓯᒪᓚᐅᔪᒻᒪᑕ ᑐᖓᓕᐊᓂ ᓄᓇᓕᓐᓂ ᐃᓕᓐᓂᐊᑎᑦᓯᒍᑎᓂᒃ ᐃᓕᓐᓂᐊᕆᐊᕐᓱᑎᒃ ᑌᔭᐅᔪᓂᒃ ᐯᕆᑦᓯᕕᓐᓂᒃ ᐊᐅᓚᑦᓯᓂᖅ. 11 ᐃᓕᓐᓂᐊᓚᐅᔪᑦ ᐱᓇᓱᐊᕈᓯᕐᒥ ᓯᕗᓪᓕᐹᒥ. ᑖᓐᓇ ᐃᓕᓐᓂᐊᑎᑦᓯᒍᑎᐅᔪᖅ ᑐᓴᐅᒪᖃᑎᒌᑦᓯᐊᓂᕐᒥᒃ, ᓯᕗᓕᕐᓂᒥᒃ, ᓱᓇᔨᐅᓂᖏᓐᓂᓗ ᐯᕆᑦᓯᕕᓐᓂ ᑲᒪᔨᒻᒪᕇᑦ ᐊᒻᒪᓗ ᖃᓄᖅ ᐃᓄᑐᐃᓐᓀᑦ ᐃᓗᕐᖁᓯᖓ ᐊᑑᑎᔭᐅᑦᓯᐊᕈᓐᓇᒪᖔᑦ ᐯᕆᑦᓯᕕᓐᓂ.

ᑖᒃᑯᐊ ᐃᓕᓐᓂᐊᑎᑕᐅᒍᑏᑦ ᐊᕐᕌᒎᑉ ᐅᖓᑖᓅᓛᕐᑐᑦ ᐃᓕᓐᓂᐊᑎᑦᑕᐅᓂᖃᖃᑦᑕᓗᑎᒃ ᐱᓇᓱᐊᕈᓯᓕᒫᒥ ᐱᖓᓲᔪᕐᑐᑦ ᐱᓇᓱᐊᕈᓯᑕᒫᑦ. ᐃᓕᓐᓂᐊᑎᑦᓯᓂᖃᖃᑦᑕᓛᕐᑐᑦ ᓄᓇᓕᓐᓂ ᐊᑦᔨᒌᖕᖏᑐᓂ. ᐃᓕᓐᓂᐊᖃᑦᑕᑐᑦ ᐱᔭᕇᑦᓯᐊᑐᐊᕈᑎᒃ ᐃᓕᓐᓂᐊᑎᑕᐅᒍᑎᒥᓂᒃ ᐱᔭᕇᕈᓯᕐᑕᐅᓛᕐᑐᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐃᓕᓐᓂᐊᓂᕐᒧᑦ.

ᐯᕆᑦᓯᕕᓐᓂ ᑲᒪᔨᒻᒪᕇᑦ ᐃᓕᓐᓂᐊᑎᑕᐅᓂᖓ ᐱᒍᓐᓇᓯᑎᑕᐅᓯᒪᔪᖅ ᐱᓇᓱᐊᖃᑎᐅᑎᓪᓗᒍ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒃ Saint-Félicien ᐊᒥᓱᒋᓪᓚᓂᒃ ᐃᑲᔪᕐᑎᖃᕐᒥᓱᑎᒃ, ᐃᓚᐅᑎᓪᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ, ᑲᑎᕕᒃ ᐃᓕᓴᕐᓂᓕᕆᓂᖅ, ᐊᓪᓓᑦ ᑯᔩ ᑲᕙᒪᖓᑦ ᐊᒻᒪᓗ ᓄᓇᓕᑐᙯᑦ ᑯᐯᒻᒥ ᓛᐸᑐᐊᒥᓗ ᐃᓗᓯᓕᕆᔨᖏᑦ ᐃᓄᓕᕆᔩᓪᓗ ᖃᐅᔨᓴᕐᑕᐅᒍᑎᖏᑦ. ᓯᕗᓪᓕᐹᒥ ᐊᑑᑎᒋᐊᖕᖓᓚᐅᔪᔪᑦ ᓄᓇᕕᒻᒥ ᕕᕗᐊᕆ 2018-ᒥᑦ ᔫᓂ 2019-ᒧᑦ.

ᐃᓘᓐᓇᑎᒃ ᑲᑎᑦᓱᑎᒃ 24 ᐯᕆᕐᓯᕖᑦ ᑐᑭᒧᐊᕐᑎᓯᔨᖏᑦ, KRG-ᑯᑦ ᐯᕆᕐᓯᕕᓐᓄᑦ ᐱᓇᓱᑦᑎᖁᑎᖏᑦ ᐊᒻᒪᓗ ᑮᓇᐅᔭᓕᕆᔨᖓ ᕃᒧ ᓴᐸᑦ ᑲᔮᓐᑦ ᓱᐊᓐᑕᓐ ᐃᓚᐅᓚᐅᔪᖅ ᐊᕐᕌᒍᑕᒫᑦ ᐊᐅᓚᑦᓯᓂᕐᒧᑦ ᑲᑎᒪᓂᖓᓂ ᑰᑦᔪᐊᒥ ᔮᓄᐊᕆ 20 ᒥ 21-ᒥᓪᓗ. ᐊᑑᑎᒋᐊᓖᑦ ᐅᖃᕐᑕᐅᓚᐅᔪᖏᓐᓂᑦ ᑐᖓᓪᓕᐅᒍᑎᐅᓚᐅᔪᖅ ᓄᓇᓖᑦ ᑐᑦᓯᒐᐅᑎᖏᑦᑕ ᐊᐅᓚᑦᓯᓕᕆᓂᕐᒧᑦ ᐯᕆᕐᓯᕖᑦ ᐱᓇᓱᑦᑎᓂᑦ ᐱᕆᐅᕐᓭᓂᕐᒧᑦ ᐱᔭᑦᓴᖅ (ᐊᑐᐃᓐᓇᐅᕐᑎᑕᕕᓂᖅ ᐱᒋᐊᖕᖓᕕᖓ ᒫᑦᓯ 9-ᒥ), ᓄᓇᓕᓕᒫᑦ ᐱᓇᓱᑦᑐᓕᕆᕕᖓ ᐊᒻᒪᓗ ᐃᒻᒪᖃᐅᑏᑦ ᒪᓕᒐᖏᑦ ᐯᕆᕐᓯᕖᑦ ᐱᓇᓱᕝᕕᖏᓐᓄᑦ, ᐊᒻᒪᓗ ᓄᑖᖅ ᐊᕐᕌᒍᑕᒫᑦ ᕿᑲᒍᓐᓇᐅᑎᓄᑦ ᐃᑲᔪᕐᓯᐅᑏᑦ ᐯᕆᕐᓯᕖᑦ ᐱᓇᓱᑦᑎᖏᓐᓄᑦ ᓄᓇᓕᓕᒫᓂᑦ.

ᑕᒪᒃᑯᐊ ᐃᓄᑦᓯᐊᐹᓗᐃᑦ, ᐊᒻᒪᓗ ᐊᒥᓱᒋᐊᓪᓓᑦ ᐃᓄᐃᑦ ᐯᕆᕐᓯᕕᓕᒫᑦ ᐱᓇᓱᕝᕕᖏᓐᓂᑦ ᓄᓇᓕᓕᒫᓂᑦ, ᓄᓇᕕᐅᑉ ᐯᕆᕐᓯᕕᖏᓐᓂᑦ ᐱᕙᓕᐊᑎᑦᓯᓂᕐᒧᑦ ᐃᑲᔪᕐᓯᓯᐊᕐᑐᑦ.

ᔫᓂ 29, 2019, 15 ᐃᓕᓐᓂᐊᑏᑦ, 8 ᐯᕆᑦᓯᕖᑦ ᐊᐅᓚᑦᓯᔨᖏᑦᑕ ᐱᓇᓱᑦᑎᖏᑦ ᐊᒻᒪᓗ 7 ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐯᕆᑦᓯᕕᓕᕆᓂᕐᒥ ᐱᓇᓱᑦᑎᖏᑦ ᑐᓂᔭᐅᓚᐅᕐᑐᑦ ᓇᓗᓀᕐᓯᒍᑎᒥᒃ ᓯᓚᑦᑐᓴᕐᕕᒧᑦ ᐃᓕᓐᓂᐊᑕᕕᓂᕐᒥᓄᑦ ᐊᐅᓚᑦᓯᓂᓕᕆᓂᕐᒥ ᐯᕆᑦᓯᕕᓐᓂ CEGEP Saint-Félicien-ᒥᑦ ᐱᔪᒥᑦ. ᑖᓐᓇ ᐱᓇᓱᐊᕐᑕᐅᔪᖅ ᓄᑖᖅ ᐱᒋᐊᓚᐅᔪᖅ ᕕᕗᐊᕆ 2018-ᒥ ᐊᒻᒪᓗ ᓄᓇᓕᓐᓂ ᐱᔭᕆᐅᕐᓭᓂᕐᒥᒃ ᑐᖕᖓᕕᖃᕐᓱᓂ ᐱᓇᓱᐊᕐᑕᐅᔪᖅ ᐃᓕᓐᓂᐊᑎᓂᒃ ᐃᓕᑦᓯᓕᐅᒥᑎᑦᓯᒍᓯᐅᑦᓱᓂ ᐅᖃᖃᑎᒌᓐᓂᒥᒃ, ᓯᕗᒃᑲᑕᕐᑎᐅᓂᕐᒥᒃ, ᐊᐅᓚᑦᓯᔨᐅᓂᕐᒥᒧᑦ ᖃᓄᐃᓘᕐᑎᐅᓂᕐᒥᒃ, ᐊᒻᒪᓗ ᖃᓄᑦ ᐃᓄᑐᐃᓐᓇᐅᓂᐅᑉ ᐃᓕᕐᖁᓯᖓᑎᒍᑦ ᐊᑑᑎᑎᑦᓯᓕᐅᒥᒍᓐᓇᓂᕐᒥᒃ ᐯᕆᑦᓯᕖᑦ ᐃᓗᐊᓂ. 

ᐅᐱᒍᓲᑦᔨᕗᒍᑦ ᐅᑯᓂᖓ (ᓴᐅᒥᐊᓂᑦ ᑕᓕᕐᐱᐊᓄᑦ ᓯᕗᐊᓃᓰᑦ) ᕉᑕ ᐃ ᐸᓚᒥᖕ, ᐋᓚᓯ ᖃᕐᖁᑐᖅ, ᓵᓐᑐᔭ ᐋᓐ ᓯᐅᓪᑦ, ᔨᐊᓯᐊ ᐃᒪᕐᓚᒃ, (ᓴᐅᒥᐊᓂᑦ ᑕᓕᕐᐱᐊᓄᑦ ᑐᓄᐊᓃᕐᓰᑦ) ᓖᓴ ᑰᑦᓄᐊ, ᕉᑕ ᒪᖏᐅᖅ, ᓯᓕᓴ ᓯᓅᐹ, ᐋᓂ ᑯᐊᑕ, ᔨᓂ ᐊᔭᒍᑕᒃ ᒥᒃᐱᒐᒃ, ᓕᓯ-ᐋᓐ ᐃᔅᐳᔮᓐ, ᒪᕇᔅ ᑐᕐᑳᑦ, ᐁᓇ ᐋᓇᓈᒃ, ᓗᐃᓴ ᐃᓄᒃᐸᒃ, ᓵᓕ ᓇᕐᑌ ᐊᒻᒪᓗ ᔫᓕ-ᐋᓐ ᐴᑎ.

ᓅᕕᒻᐱᕆ-ᒥ, 6-ᓂᒃ ᐯᕆᑦᓯᔨᓂᒃ ᑲᖏᕐᓱᐊᓗᔾᔪᐊᒥᐅᓂᒃ ᐱᑎᑕᐅᔪᖃᓕᓚᐅᕆᕗᖅ ᐃᓕᑕᕆᔭᐅᒍᑎᓂᒃ ᐃᓕᓐᓂᐊᕕᒻᒪᕆᒻᒥᑦ ᐃᓕᓐᓂᐊᒍᑎᕕᓂᕐᒥᓂᑦ ᑖᒃᑯᓇᖕᖓᑦ ᓄᓇᓕᑐᖃᕐᓂᒃ ᐊᒻᒪᓗ ᐃᓄᐃᑦ ᐯᕆᑦᓯᕕᓕᕆᓂᕐᒧᑦ ᐱᒍᑦᔨᕕᖓᓂᑦ St-Felicien College ᐃᓕᓐᓂᐊᕕᒻᒪᕆᖓᓂᑦ. ᑕᒪᓐᓇ ᐊᑦᔨᒋᔭᐅᖏᑑᓂᖃᕐᓱᓂ ᐱᔭᕇᕐᓂᐅᓚᐅᕐᑐᖅ ᑖᒃᑯᓇᖕᖓᑦ 6-ᓂᑦ ᐱᔭᕇᓚᐅᕐᑐᓂᑦ, 5-ᖑᓚᐅᕐᒪᑕ ᐊᕐᓀᑦ ᐊᒻᒪᓗ ᓯᕗᓪᓕᐹᒥ ᐊᖑᑎᒥᒃ ᐱᔭᕇᕐᑐᖃᓚᐅᕐᓱᓂ ᐃᓕᓐᓂᐊᑕᕐᒥᓂᒃ.  ᑖᓐᓇ ᑑᒪᔅ ᒧᐊᑲ ᐃᑦᔭᒐᑦᓴᐅᓕᕐᑐᖅ ᐅᒃᑯᐃᓯᒍᑎᐅᓕᓚᐅᕐᒪᑦ ᐊᓯᖏᓐᓄᑦ ᐊᖑᑎᓄᑦ ᐃᓚᐅᖃᑕᐅᒍᓐᓇᓂᐊᓕᕐᒪᑕ ᐯᕆᑦᓯᕕᓕᕆᓂᕐᒧᑦ ᐊᒻᒪᓗ ᓯᕗᓂᑦᓴᒥ ᐃᓕᓐᓂᐊᑎᑕᐅᕙᓐᓂᐊᓕᕐᑐᓄᑦ ᐊᖑᑎᓄᑦ.

ᐅᐱᒋᔭᐅᓚᐅᕐᑐᖅ ᐅᑯᐊᖑᒻᒪᑕ (ᓴᐅᒥᐊᓂᑦ ᑕᓕᕐᐱᐊᓄᑦ): ᓗᐃᓴ ᐃᑦᑐᖅ, ᒫᓖᓐ ᐃᑦᑐᓛᒃ, ᑖᒪᔅ ᒧᐊᑲ, ᒪᖏᐅᒃ ᐋᓇᓈᒃ, ᔨᓂ ᐋᓇᓈᒃ ᑕᒧᓭ ᐊᒻᒪᓗ ᔨᐊᓯᑲ ᐃᒪᕐᓚᒃ.