ᐃᓕᓐᓂᐊᑎᕆᓂᕐᒧᑦ ᐱᓂᐊᕐᓂᑕᖅ
ᐯᕆᑦᓯᕖᑦ ᓇᓗᓀᕐᑕᐅᒍᑎᖏᑦ
ᐯᕆᑦᓯᕖᑦ ᐱᖁᑎᒋᔭᐅᔪᑦ ᖄᖏᕐᓂᑯᓕᐅᕐᑎᐅᖏᑦᑐᒧᑦ ᑯᐊᐳᔦᓴᒧᑦ ᑎᒍᒥᐊᕐᓂᓕᓐᓄᑦ ᐃᖏᕐᕋᑎᑦᓯᒍᓐᓇᐅᑎᓂᒃ ᐱᓯᒪᔪᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ.
ᐯᕆᑦᓯᕖᑦ ᐊᐅᓚᑕᐅᓂᓖᑦ ᓂᕈᐊᕐᑕᐅᓯᒪᔪᓄᑦ ᑲᑎᒪᔨᓄᑦ. ᐅᓄᕐᓂᓴᖏᑦ ᑲᑎᒪᔨᓄᑦ ᐃᓚᐅᔪᑦ ᐱᖓᓱᑦ ᒪᕐᕈᓗᐊᖏᑦ, ᐊᖓᔪᕐᖄᕆᔭᐅᔪᑦ ᑲᒃᑲᓛᓄᑦ ᐯᕆᑦᓯᕕᓕᐊᕐᑕᑐᓄᑦ.
ᐯᕆᑦᓯᕖᑦ ᐃᓪᓗᐊᕈᓯᖃᕐᐳᑦ ᒪᓕᑦᑕᐅᑎᓗᒋᑦ ᖃᑦᓯᑕᖃᕆᐊᖃᕐᓂᖏᓐᓄᑦ ᑲᒃᑲᓛᓂᒃ ᒪᓕᒉᑦ ᓇᓗᓀᕐᑕᐅᓯᒪᑦᓱᑎᒃ ᐯᕆᑦᓯᕕᐅᑉ ᐱᔪᓐᓇᐅᑎᖓᓂ.
ᐃᓪᓘᑉ ᐊᖏᓂᖏᑦ ᒪᓕᑦᓱᒋᑦ ᖃᑦᓯᑕᖃᕆᐊᖃᕐᓂᖏᑦ ᓱᕐᖁᐃᑕᐅᓯᒪᓲᑦ ᐊᒻᒪᓗ ᐱᔪᓐᓇᐅᑎᖏᑦ ᑕᑯᑦᓴᐅᑎᑦᓯᕕᐅᑦᓱᑎᒃ ᐅᑯᐊ ᐱᒻᒪᕇᑦ ᖃᓄᐃᓕᖓᒋᐊᖃᕈᑎᖏᑦ:
- 1 ᐱᒋᐅᕐᓴᑎᑦᓯᔨ ᓇᔪᕐᑎᖃᕆᐊᓕᒃ ᑲᒪᒋᓗᒋᑦ 5-ᓂᒃ ᓄᑕᕋᕐᓂᒃ ᑕᕐᕿᓕᓐᓂᒃ 3-ᓂᑦ 7-ᓄᑦ.
- 1 ᐱᒋᐅᕐᓴᑎᑦᓯᔨ ᓇᔪᕐᑎᖃᕆᐊᓕᒃ ᑲᒪᒋᓗᒋᑦ 8-ᓂᒃ ᑲᒃᑲᓛᓂᒃ ᑕᕐᕿᓕᓐᓂᒃ 18-ᓂᑦ 60-ᓄᑦ.
ᑭᓯᐊᓂ ᑲᑎᒪᔩᑦ ᑐᑭᑖᕆᒍᓐᓇᓲᒍᒻᒥᔪᑦ ᐱᒋᐅᕐᓴᑎᑦᓯᔩᑦ ᐱᔪᓐᓇᓂᖏᑦ ᒪᓕᑦᓱᒋᑦ ᖃᑦᓯᓂᒃ ᑲᒃᑲᓛᓂᒃ ᑲᒪᒍᓐᓇᕕᖃᕐᒪᖔᑕ ᒐᓗᐊᕐᓱᑎᒃ ᑐᕌᒐᓕᐊᒍᓯᒪᔪᓂᒃ ᒪᓕᑦᑕᐅᑎᑦᓯᖏᓐᓇᕋᓱᐊᓲᑦ.
ᐃᓘᓐᓇᖏᓐᓄᐊᖓᔪᑦ ᑐᕌᒐᖏᑦ ᐯᕆᑦᓯᕖᑦ
ᐯᕆᑦᓯᕖᑦ ᓯᕗᓪᓕᐸᐅᑎᓗᒋᑦ ᑐᕌᒐᖃᕐᐳᑦ ᒪᓂᒪᑎᑦᓯᒋᐊᖃᕐᓂᒥᒃ ᐊᓕᐊᓇᕐᑐᒥᒃ, ᐃᓗᓯᕐᓱᓇᕐᑐᒥᒃ ᐊᒻᒪᓗ ᐱᕈᑉᐸᓕᐊᑦᓯᐊᓇᕐᑐᒥᒃ ᐊᕙᑎᖃᕐᑎᓯᓂᖅ ᑲᒃᓛᓂᒃ ᑕᕐᕿᓕᓐᓂᑦ 3-ᓂᒃ ᑎᑭᑦᓱᒋᑦ ᐃᓕᓴᕆᐊᓕᕐᓵᕕᓐᓄᑦ ᐃᑎᕈᓐᓇᓕᕐᑐᑦ; ᐊᒻᒪᓗ ᐱᒻᒪᕆᐅᓂᕐᐹᖁᑎᒋᑦᓱᒍ ᐊᑦᑕᓀᑦᑐᒦᑦᑎᓯᓂᖅ ᐯᕆᑦᓯᕕᒻᒦᑐᓂᒃ.
ᐯᕆᑦᓯᕕᒻᒥ ᐱᒋᐅᕐᓴᑎᑦᓯᔩᑦ ᐅᑯᓂᖓ ᐱᓇᓱᒐᓪᓚᕆᓖᑦ
- ᐸᕐᓀᐸᓪᓗᒋᑦ ᐊᒻᒪᓗ ᐊᑑᑎᑎᕙᓪᓗᒋᑦ ᐃᓕᓐᓂᐊᑎᑦᓯᓂᕐᓄᑦ ᓱᖃᑦᓯᑎᑦᓯᐅᑏᑦ ᐋᕐᕿᓱᕐᓯᒪᑎᓪᓗᒋᑦ ᐱᕙᓪᓕᐊᑎᑦᓯᒋᐊᕈᑎᐅᓗᑎᒃ ᐃᓘᓐᓈᒍᑦ ᐱᕈᑉᐸᓕᐊᑦᓯᐊᓂᖏᓐᓄᑦ ᑲᒃᑲᓛᑦ ᐃᓕᖓᑎᓪᓗᒋᑦ. ᐃᓕᒪᕕᐅᓂᖃᕐᑎᓗᒋᑦ ᐊᒻᒪᓗ ᓄᐃᑕᑎᑦᓯᓂᖃᓪᓚᕆᓪᓗᑎᒃ ᐃᓗᒡᒍᓯᒥᒃ.
- ᐊᑦᑕᓇᖕᖏᑐᒦᑦᑎᖏᓐᓇᓗᒋᑦ ᑲᒃᑲᓛᑦ ᑲᒪᒋᔭᐅᑦᓯᐊᓂᖃᕐᓗᑎᒃ ᓯᓚᒥ ᐊᓃᖕᖑᐊᕕᖏᑦ; ᐃᓪᓗᒥ ᐊᕐᖁᑎᑯᑖᑦ; ᖁᕐᕕᑯᕖᑦ; ᑲᑕᒐᓴᖏᑦ.
- ᑲᒃᑲᓛᑦ ᑭᖕᖒᒪᔭᖏᓐᓂᒃ ᐁᑦᑐᑐᐃᑦᓯᐊᐸᓪᓗᑎᒃ ᐅᑯᓅᓇ ᑲᒪᒋᑦᓯᐊᓗᒋᑦ, ᓂᕆᒃᑲᓯᐊᕐᓗᒋᑦ, ᓴᓗᒪᑎᑦᓯᐊᓗᒋᑦ ᐊᒻᒪᓗ ᓯᓂᒋᐊᖃᓕᕐᐸᑕ ᓯᓂᒍᓐᓇᕕᖃᕐᑎᓯᐊᕐᓗᒋᑦ.
- ᑲᒃᑲᓛᑦ ᐱᓪᓗᑯᒋᐊᓕᑎᒍᑦ ᑲᒪᒋᔭᐅᒋᐊᓖᑦ ᓴᐳᑦᔨᓯᒪᕙᓪᓗᒋᑦ ᒪᓕᓪᓗᒋᑦ ᐱᓇᓱᑦᑎᓚᕇᑦ ᐸᕐᓀᒍᑎᓕᐊᕆᓯᒪᔭᖏᑦ ᐃᑲᔪᕐᓯᔭᐅᑦᓯᐊᕆᐊᖃᕐᓂᖏᓐᓄᑦ.
- ᑲᒃᑲᓛᑦ ᐊᖓᔪᕐᖄᖏᓐᓂᒃ ᑲᒪᖃᑎᖃᑦᓯᐊᐸᓪᓗᑎᒃ ᐊᒻᒪᓗ ᓴᐳᑦᔨᓯᒪᑦᓯᐊᐸᓪᓗᑎᒃ.
- ᐱᓇᓱᐊᖃᑎᖃᑦᓯᐊᐸᓪᓗᑎᒃ ᐱᓇᓱᐊᖃᑎᒌᑦᓯᐊᓗᑎᓗ ᐱᒋᐅᕐᓴᑎᑦᓯᔩᑦ ᐊᒻᒪᓗ ᐯᕆᑦᓯᕖᑦ ᐊᐅᓚᑦᓯᔨᖏᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐊᓯᖏᑦ ᓯᓚᑖᓂᒥᐅᑦ ᑎᒦᑦ ᙯᖁᔭᐅᓯᒪᔪᑦ ᐱᓇᓱᐊᖃᑎᒋᔭᐅᓚᖓᑎᓪᓗᒋᑦ ᐱᒋᐅᕐᓴᑎᑦᓯᔨᓂᒃ.
ᐊᓐᓂᓇᕐᑐᖁᑎᖏᑦ
ᑭᒡᒐᑐᕈᑎᕗᑦ ᑐᖕᖓᕕᓕᒃ ᐃᓄᐃᑦ ᑲᒃᑲᓛᑦ ᑭᖕᖒᒪᔭᖏᓐᓂᒃ ᐊᒻᒪᓗ ᓇᔪᕐᑕᒥᓂᒃ ᓈᒻᒪᓴᑦᓯᐊᕆᐊᖃᕐᓂᖏᑦ. ᑖᓐᓇ ᑭᒡᒐᑐᕈᑎᒃ ᓴᓇᒻᒪᓕᐅᕐᑕᐅᓯᒪᔪᖅ ᐊᒻᒪᓗ ᒪᓕᑦᑕᐅᓯᐊᕐᓂᖃᕐᐸᒋᐊᖃᕐᓱᑎᒃ ᑕᑲᒃᑯᐊ ᐊᓐᓂᓇᕐᑐᖁᑏᑦ ᓲᓱᑦᓴᕈᑕᐅᔪᑦ ᐃᓗᒡᒍᓯᒥᒃ ᓲᓱᑦᓴᓯᐊᕈᓰᑦ ᐱᒻᒪᕆᖁᑎᒋᔭᐅᑦᓯᐊᓗᑎᒃ ᐊᒻᒪᓗ ᐅᐃᒍᕆᔭᐅᑎᓗᒋᑦ ᐃᓕᓐᓂᐊᑎᑦᓯᐅᑎᐅᖁᔭᖏᑦ ᑲᒃᑲᓛᑦ ᐊᖓᔪᕐᑳᖏᑦᑕ ᕿᑐᕐᖓᒥᓄᑦ ᐃᓕᓐᓂᐊᑎᑦᓯᐅᑕᐅᓗᑎᒃ ᓈᒻᒪᒋᔭᖏᑦ ᐊᕐᕌᒍᖏᓐᓂ ᕿᑐᕐᖓᖏᑦᑕ ᓯᕗᓪᓕᐹᓂ ᐃᓕᑦᓯᔭᐅᕙᓪᓕᐊᖁᓇᕐᑐᖁᑎᒋᑦᓱᒋᑦ.
- ᐱᔪᓐᓇᓯᐊᕐᑐᕆᓂᖅ ᐱᐅᔪᕆᓂᖅ
- ᓲᓱᑦᓴᕆᐊᖃᕐᓂᖅ ᐊᖓᔪᑦᓯᓂᒃ ᐃᓄᓐᓂᒃ ᐱᓗᐊᕐᑐᒥᒃ ᐃᓄᑐᖃᕐᓂᒃ; ᐊᓯᒥᓂᒃ ᐊᒻᒪᓗ ᐊᕙᑎᒥᓂᒃ
- ᖃᓄᓕᒫᖅ ᐃᓗᓯᕐᓱᓯᐊᕋᓱᐊᕆᐊᖃᕐᓂᖅ
- ᐊᓯᒥᓂᒃ ᐊᕕᖃᑎᖃᑦᓯᐊᕆᐅᕐᓴᓂᖅ
- ᐃᓄᐃᑦ ᐅᖃᐅᓯᖓ
- ᐃᓂᕐᓯᓯᐊᕈᓐᓇᕆᐅᕐᓴᓂᖅ
- ᐱᓀᓗᑕᕐᓂᒃ ᐋᕐᕿᓱᐃᒋᐅᕐᓴᓂᖅ ᐊᒻᒪᓗ ᐊᑐᑦᓯᐊᕈᓐᓇᕆᐅᕐᓴᓂᖅ ᐊᑐᐃᓐᓇᓂᒃ
ᑭᒡᒐᑐᕈᑎᒃ
ᐯᕆᑦᓯᕖᑦ ᐊᑑᑎᑎᑦᓯᕗᑦ ᐊᒻᒪᓗ ᐊᑑᑎᑎᑦᓯᕙᒋᐊᖃᕐᓱᑎᒃ ᐃᓕᓐᓂᐊᑎᑦᓯᓂᕐᓄᑦ ᑭᒡᒐᑐᕈᑎᖓᓂᒃ ᐃᓚᒌᓐᓄᑦ ᕿᑐᕐᖓᕇᓄᑦ ᑯᐯᑉ ᑐᕐᖃᑕᕐᕕᖓᑕ Ministère de La Famille et de l’Enfance du Québec ᐊᕐᖁᑎᒋᑦᓱᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑖᒃᑯᐊᓗ ᐃᓄᐃᑦ ᐃᓗᒡᒍᓯᖓᓂᒃ ᐃᓕᔨᓯᒪᑦᓱᑎᒃ ᓄᐃᑕᑎᑕᐅᔪᑦᓴᐅᑎᓗᒍ ᐯᕆᑦᓯᕕᓐᓂ.
ᐱᒋᐅᕐᓴᑎᑦᓯᔩᑦ ᑲᒪᒋᔭᖃᕆᐊᖃᕐᐳᑦ ᑲᒪᒋᔭᒥᑕ ᓱᖃᑦᓯᐅᑎᑦᓴᖏᓐᓂᒃ ᐃᓕᓐᓂᐊᑎᑕᐅᒍᑎᑦᓴᖏᓐᓂᒃ ᐸᕐᓀᓂᓂᕐᓂᒃ, ᐱᖕᖑᐊᖏᓐᓂᒃ, ᐱᐅᒃᑯᑎᓂᒃ ᐊᒻᒪᓗ ᐅᓪᓗᓕᒫᖅ ᐊᑑᑎᖃᑦᑕᓂᐊᕐᑕᖏᑦᑕ ᓈᒻᒪᓯᑦᑕᕈᑎᑦᓴᖏᓐᓂᒃ. ᐃᓕᓐᓂᐊᑎᑦᓯᓂᕐᓄᑦ ᐸᕐᓀᓯᒪᐅᑏᑦ ᑐᖕᖓᕕᖃᕐᑎᓗᒋᑦ ᐃᓕᓐᓂᐊᑎᑦᓯᓂᕐᓄᑦ ᑭᒡᒐᑐᕈᑎᒥᒃ ᐋᕐᕿᓱᕐᓯᒪᑎᓪᓗᒋᑦ ᑲᒃᑲᓛᑦ ᐅᑭᐅᖏᑦᑕ ᐱᕙᓪᓕᐊᓂᖏᑦᑕᓗ ᒪᓕᑦᑎᓗᒋᑦ ᐃᓚᖃᕐᑎᓗᒋᑦ ᐃᓗᒡᒍᓯᖏᓐᓂᒃ ᐃᓕᓐᓂᐊᑎᑦᓯᐅᑎᓂᒃ ᐃᓘᓐᓇᑎᒃ ᐅᑭᐅᖃᖃᑎᒌᖕᖏᑐᑦ ᑌᒣᓕᖓᔪᓂᒃ ᐸᕐᓀᒍᑎᓂᒃ ᒪᓕᑦᑎᑕᐅᒋᐊᖃᕐᐸᓱᑎᒃ.
ᐅᓪᓗᑕᒫᑦ, ᐱᒋᐅᕐᓴᑎᑦᓯᔩᑦ ᐊᑐᐃᓐᓇᕈᑦᑎᕆᕙᑦᑐᑦ ᐊᑐᐃᓐᓇᕈᕐᑎᕆᕙᒋᐊᖃᕐᓱᑎᓗ ᐱᓇᓱᐊᕐᑕᐅᔪᑦᓴᓂᒃ ᑲᒃᑲᓛᓂᒃ ᐃᑲᔪᕐᓯᐅᑎᑦᓴᐅᑎᓗᒋᑦ ᐃᓘᓐᓈᒍᑦ ᐱᕈᕐᐸᓕᐊᑦᓯᐊᕈᑎᒋᓂᐊᕐᑕᖏᓐᓂᒃ ᐊᒻᒪᓗ ᐃᑉᐱᒍᓱᓕᕈᑎᒋᓂᐊᕐᑕᖏᓐᓂᒃ ᐃᓄᐃᑦ ᐃᓗᒡᒍᓯᖓᓂᒃ. ᑖᒃᑯᐊ ᐱᓇᓱᐊᕐᑕᐅᑎᑕᐅᔪᑦ ᐊᑑᑎᑎᑕᐅᕙᑦᑎᓗᒋᑦ ᑲᒃᑲᓛᓄᑦ ᐅᑭᐅᖃᖃᑎᒌᓄᑦ ᑐᕌᕐᑎᓗᒋᑦ, ᐃᓚᖓᓐᓂᓗ ᓱᖃᑦᓯᑎᑕᐅᓲᒍᒻᒥᔪᑦ ᐸᕐᓀᑕᐅᓯᒪᔪᓂᒃ ᑐᕌᖓᑎᓪᓗᒋᑦ ᑲᑎᒪᑎᑕᐅᑎᓗᒋᓪᓗ ᑲᒃᑲᓛᑦ ᐅᑭᐅᖃᖃᑎᒌᖕᖏᑐᑦ; ᐅᑭᐅᖃᖃᑎᒌᖕᖏᑐᓗ ᑲᑎᒪᓕᕐᒪᑕ ᐃᑲᔪᕐᓯᔭᐅᓯᒪᑦᓱᑎᒃ ᑲᒃᑲᓛᓂᒃ ᐱᒋᐅᕐᓴᑎᑦᓯᔨᒧᑦ, ᑲᒃᑲᓛᑦ ᑐᑭᑖᕋᓱᐊᕐᑎᑕᐅᓲᑦ ᓱᒍᒪᒻᒪᖔᑕ ᐅᓪᓗᒥ ᐊᑑᑎᓚᖓᔪᒥ.
ᐯᕆᑦᓯᕖᑦ ᐃᓘᓐᓈᒍᑦ ᓈᒻᒪᓯᓕᕐᑎᑕᐅᓯᒪᒍᑎᖏᑦ ᑲᒃᑲᓛᓄᑦ
ᐃᓘᓐᓇᑎᒃ ᑲᒃᑲᓛᑉ ᐱᕈᕐᐸᓕᐊᒍᓯᖏᑦ ᖃᓄᓕᒫᖅ ᐱᕙᓪᓕᐊᑎᑕᐅᑦᓯᐊᓂᓖᑦ ᐊᕐᖁᑎᒋᑦᓱᒍ ᐃᓕᓐᓂᐊᑎᑦᓯᐅᑎᒃ ᓱᖃᑦᓯᑎᑦᓯᐅᑎᑕᓕᒃ ᓈᒻᒪᖁᐊᕇᑦᑎᓯᕕᐅᑦᓱᓂ "ᐱᑦᔪᑎᖃᓪᓚᕆᑦᑐᓂᒃ" ᐃᓚᖃᕐᑎᓗᒋᑦ "ᐱᑦᔪᑎᖃᓪᓚᕆᖕᖏᑐᓂᒃ" ᐱᖕᖑᐊᑎᑦᓯᐅᑎᓂᒃ. ᑲᒃᑲᓛᖅ ᐱᒐᓱᐊᒻᒪᕆᐅᑎᖓ ᐃᓘᓐᓀᓂ ᐱᕙᓪᓕᐊᓂᕐᒥᓂᒃ ᐱᕙᓪᓕᑕᐅᓂᖃᑦᓯᐊᕈᓐᓇᒪᑦ ᐊᕙᑎᒥᓄᑦ ᐊᒻᒪᓗ ᒪᓕᑦᓱᒋᑦ ᐊᑐᓂᑦ ᐱᐅᓯᖏᑦ ᑲᒃᑲᓛᑉ.
ᐯᕆᑦᓯᕕᓐᓂ ᑭᒡᒐᑐᕈᑎᒃ ᑐᕌᒐᓕᒃ ᒪᓂᒪᑎᑦᓯᓂᕐᒥᒃ ᐃᓘᓐᓀᓄᑦ ᑲᒃᑲᓛᓄᑦ ᐃᓗᐃᒃᑲᑎᒍᑦ ᑕᒪᒃᑯᓂᖓ ᐱᒐᓱᐊᒻᒪᕆᐅᑎᒥᓂᒃ ᐱᒋᐅᕐᓴᓱᒋᑦ ᐱᒋᐅᕐᑎᓯᒋᐊᕐᓂᓂᒃ. ᑭᒡᒐᑐᕈᑎᕗᑦ ᓴᐳᑦᔨᐅᑎᒋᔭᐅᑦᓯᐊᑐᖅ ᐃᓘᓐᓀᓂᒃ ᑲᒃᑲᓛᓂᒃ ᐱᓪᓗᑯᑦᑐᑎᒎᕐᑎᓗᒋᑦ ᐱᒋᐅᕐᑎᓯᐅᑎᐅᒋᐊᕐᓂᖃᕐᑎᓗᒋᑦ ᐅᑯᓅᓇᓗᐊᖕᖑᐊᖅ:
- ᐅᖃᕆᐅᕐᓴᓂᖅ
- ᑕᑯᑦᓴᓯᐊᑎᒍᑦ, ᑲᔪᓯᖏᓐᓇᑐᑎᒍᑦ ᐊᒻᒪᓗ ᓄᕐᖃᔪᐃᑦᑐᑎᒍᑦ ᑕᓯᐅᕐᓯᓯᒪᓂᖅ
- ᐱᓀᓗᑕᓂᒃ ᐋᕐᕿᒍᑎᑦᓴᓕᐅᕐᓂᖅ, ᐊᖏᖃᑎᒌᒐᓱᐊᕆᐅᕐᓴᓂᖅ ᐊᒻᒪᓗ ᓈᒻᒪᒋᐅᑎᖕᖏᓂᕐᓂᒃ ᐋᕐᕿᖃᑎᖃᕆᐅᕐᓴᓂᖅ
- ᓄᐃᑦᓯᕙᓪᓕᐊᓂᖅ ᐃᒻᒥᓂᒃ - ᓈᒻᒪᒋᓂᕐᒥᒃ
- ᓄᑭᑖᕐᑎᓯᓂᖅ
ᑕᑲᒃᑯᐊ ᐃᓱᒪᑦᓴᓯᐅᕈᑎᑦᓭᑦ ᓱᓇᓂᒃ ᐊᑑᑎᓂᐊᕐᒪᖔᒻᒥᒃ ᐯᕆᑦᓯᕕᓐᓂ ᐱᒋᐅᕐᓴᑎᑦᓯᔩᑦ ᐊᒻᒪᓗ ᑲᒃᑲᓛᑦ ᓇᓪᓕᑳᕋᑦᓴᕆᕙᑦᑕᖏᓐᓄᑦ.
ᓱᖃᑦᓯᓂᐅᑎᑕᐅᕙᑦᑐᓂᒃ ᐆᑦᑑᑏᑦ
ᒪᔪᕋᕐᑐᖅ, ᓯᑐᕋᕐᑐᑦ, ᖃᐅᔨᓴᕐᑐᑦ, ᐅᕐᕈᑌᓕᒋᐅᕐᓴᑐᑦ ᑲᑕᑦᑌᓕᒋᐅᕐᓴᑐᓪᓗ ᐊᒻᒪᓗ ᐊᓯᖏᑦ ᐱᖕᖑᐊᑎᑦᓯᐅᑏᑦ ᐊᑐᕐᓱᒋᑦ ᐸᑦᑌᑦ, ᐯᓯᑯᐃᑦ, ᓯᐅᕋᖅ ᐊᐳᑎᒃ ᐊᒻᒪᓗ ᐃᒪᖅ. ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓗᒡᒍᓯᖓ ᐃᓕᒪᑎᑕᐅᒍᓐᓇᑐᖅ ᐊᕐᖁᑎᒋᓗᒋᑦ ᓱᖃᑦᓯᑎᑦᓯᓃᑦ ᐃᓕᖓᔪᑦ ᐊᕙᑎᒧᑦ: ᐆᑦᑑᑎᒋᑦᓱᒍ ᓄᓇᓕᐊᕐᑎᓯᓂᖅ, ᐆᒪᔪᐃᑦ ᑐᒥᖏᓐᓂᒃ ᕿᒥᕐᕈᑎᑦᓯᓂᖅ, ᑐᐱᐊᐱᓐᓂᒃ ᓇᑉᐯᓂᖅ ᐊᐳᑎᒥᓪᓘᓃᑦ ᐃᓪᓗᓕᐅᕈᑦᔭᐅᑎᑦᓯᓂᖅ, ᓄᓂᕙᒋᐊᕐᑎᓯᓂᖅ, ᐃᖃᓗᑦᓯᐅᑎᑦᓯᓂᒃ ᐊᓯᖏᓪᓗ.
ᐃᓱᒪᒥᓂᒃ ᐊᑐᕐᓱᑎᒃ ᐱᖕᖑᐊᑐᑦ: ᐆᑦᑑᑏᑦ
ᐱᖕᖑᐊᑐᑦ ᓄᓇᒃᑰᔫᖕᖑᐊᓂᒃ, ᖃᒧᑎᑲᓪᓚᖑᐊᓂᒃ, ᑎᒻᒥᔫᖕᖑᐊᓂᒃ, ᐃᓅᔭᓂᒃ, ᓯᒃᑭᑕᓂᒃ, ᐆᒪᔪᖕᖑᐊᓂᒃ, ᐊᒡᒐᒧᑦ ᐊᐅᓚᑕᐅᓲᓂᒃ ᐃᓄᖕᖑᐊᓂᒃ ᐅᖄᑎᑦᓯᖑᐊᑦᓴᐅᑎᓂᒃ, ᐊᓐᓄᕌᑦᓴᔭᖏᓐᓂᒃ ᐃᓄᐃᑦ ᐱᖕᖑᐊᑎᑦᓯᓂᖅ ᐊᓯᖏᓪᓗ.
ᑐᓴᕐᓂᔮᕐᑎᓯᓂᖅ: ᐆᑦᑑᑏᑦ
ᑐᓴᕐᓂᔮᕐᑎᓯᔪᑦ ᐱᐅᒃᑯᑎᑦᓴᔭᖏᑦ, ᓂᐱᓕᐅᕐᓯᒪᔪᑦ ᐃᖕᖏᖑᐊᕐᑐᑦ, ᐊᓯᖏᓪᓗ. ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓗᒡᒍᓯᖓ ᐃᓕᒪᑎᑕᐅᒍᓐᓇᑐᖅ ᐊᕐᖁᑎᒋᓗᒋᑦ ᐃᖕᖏᖑᐊᕐᓃᑦ, ᑖᓂᓯᕐᓃᑦ ᐊᒻᒪᓗ ᐊᑦᓴᑕᕐᓃᑦ.
ᐅᓂᒃᑳᖑᐊᕐᑎᓯᓂᖅ: ᐆᑦᑑᑏᑦ
ᖃᓄᐃᑦᑐᑐᐃᓐᓀᑦ ᐅᓂᒃᑳᖑᐊᑦ ᑲᒃᑲᓛᓄᑦ ᐱᐅᔪᐃᑦ. ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓗᒡᒍᓯᖓ ᐃᓕᒪᑎᑕᐅᒍᓐᓇᑐᖅ ᐊᕐᖁᑎᒋᓗᒋᑦ ᐅᓂᒃᑳᖑᐊᕐᕕᐅᑎᑦᓯᓃᑦ ᐃᓄᒻᒪᕆᓐᓄᑦ. ᓄᓇᓕᓐᓂᓗ ᐱᓇᓱᑦᑎᒧᑦ ᐅᕝᕙᓘᓐᓃᑦ ᑲᒃᑲᓛᑦ ᐊᖓᔪᕐᖄᖓᓄᑦ ᐅᓂᒃᑳᕕᐅᒍᓐᓇᒥᔪᑦ ᐱᒋᐊᕐᐸᓕᐊᓯᒪᓂᖏᓐᓂᒃ ᐃᓄᐃᑦ ᐊᑐᕐᓗᒋᑦ ᑕᑯᓐᓇᕋᑦᓴᓕᐊᒍᓯᒪᔪᑦ, ᑐᓴᕐᓂᔮᕐᑎᓯᐅᑏᑦ, ᐊᑦᔨᖑᐊᑦ ᐊᓯᖏᓪᓗ. ᓄᓇᓕᓐᓄᑦ ᐃᓐᓂᐊᓯᒪᔪᑦ ᐅᓂᒃᑳᕕᖃᕈᓐᓇᒥᔪᑦ ᓇᒻᒥᓂᕐᒥᓄᐊᖓᔪᓂᒃ ᐊᒻᒪᓗ ᓇᓂᒥᐅᒍᒻᒪᖔᕐᒥᒃ ᐊᓯᖏᓪᓗ.
ᑕᑯᒥᓇᕐᑐᓕᐅᕐᓂᖅ ᐊᒻᒪᓗ ᓴᓇᖕᖑᐊᓂᖅ
ᖃᓄᓕᒫᖅ ᒥᖑᐊᕆᓃᑦ, ᑭᑦᔭᓃᑦ, ᓂᐱᑎᕆᓃᑦ, ᐊᑭᓐᓇᒥᐅᑕᓕᐅᕐᓃᑦ ᐊᒻᒪᓗ ᑲᑎᕐᓱᓯᒪᔪᓕᐅᕐᓃᑦ ᐊᓯᖏᓪᓗ ᑲᒃᑲᓛᓄᑦ ᐱᕙᓪᓕᖁᑎᐅᕗᑦ. ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓗᒡᒍᓯᖓ ᐃᓕᒪᑎᑕᐅᒍᓐᓇᑐᖅ ᐊᕐᖁᑎᒋᓗᒋᑦ ᐳᓛᕆᐊᕐᑕᐅᓂᖏᑦ ᓄᓇᓕᓐᓂ ᑕᑯᒥᓇᕐᑐᓕᐅᕐᑎᓄᑦ.
ᐃᓱᒪᒋᐅᕐᓴᑎᑦᓯᐅᑎᓂᒃ ᐱᖕᖑᐊᓃᑦ
ᐊᑦᔨᒌᑦᓯᐅᓂᖅ ᐊᑐᕐᓱᒋᑦ ᐳᐃᒍᕐᑌᓕᒍᑏᑦ ᐊᒻᒪᓗ ᐃᓚᒌᑦᑐᓯᐅᕐᑐᑦ ᐱᖕᖑᐊᕈᑎᖏᑦ. ᐊᕕᑦᑐᓯᒪᔪᓕᐅᕐᓂᖅ ᐊᒻᒪᓗ ᐃᓚᒌᓈᕐᑎᑐᓕᐅᕐᓂᖅ ᐊᑦᔨᒌᖕᖏᑐᓂᒃ ᓴᓇᒻᒪᓕᓐᓂᒃ ᑕᑯᔭᐅᒍᓐᓇᑐᓂᒃ ᐃᓪᓘᑉ ᐃᓗᐊᓂ ᐊᒻᒪᓗ ᓯᓚᒥ.
ᐆᑦᑑᑏᑦ ᐅᓪᓗᑕᒫᑦ ᓈᒻᒪᓯᑦᑕᕈᑎᒋᓲᖏᓐᓂᒃ ᐯᕆᑦᓯᕕᒻᒦᑐᑦ ᐊᑑᑎᕙᑦᑕᖏᑦ ᑲᒃᑲᓛᑦ ᐊᖓᔪᑦᓰᑦ
ᐱᒻᒪᕆᐅᕗᖅ ᐱᒋᐅᕐᓴᑎᑦᓯᔩᑦ ᐱᓇᓱᕝᕕᒥᓃᑉᐸᒋᐊᖃᕐᓂᖏᑦ 15 ᒥᓂᑦᔅᓂ ᕿᑐᕐᖓᕇᑦ ᐯᕆᑦᓯᕕᒃ ᐅᒃᑯᐃᐸᑦ ᐃᑎᐅᕐᖃᓚᐅᕐᑎᓇᒋᑦ.
8:30 ᕿᑐᕐᖓᕇᑦ ᑐᖕᖓᓱᑦᑎᑕᐅᓂᖏᑦ
9:00 ᑲᒃᑲᓛᑦ ᐃᕐᕈᑐᕐᑐᑦ ᐅᓪᓛᕈᒥᑕᓚᖓᑦᓱᑎᒃ. ᓂᕆᓂᖏᓐᓂ ᐅᖄᖃᑎᒌᑦᑎᑕᐅᓗᑎᒃ ᐅᖄᖃᑎᒋᔭᐅᓗᑎᓗ ᐅᓪᓗᓯᐅᑦᓯᐊᓂᕐᓴᐅᓂᐊᕐᒪᑕ. .
ᐱᒻᒪᕆᐅᕗᖅ ᑲᒃᑲᓛᑦ ᐃᒪᑐᐃᓐᓇᑐᖃᑦᑕᓂᐊᕐᑕᖓᓂᒃ ᐃᒥᕈᓕᕈᑎᒃ ᐃᒪᖃᕐᑎᓯᓂᖅ ᐳᐃᒍᕐᑕᐅᑌᓕᓗᓂᓗ ᐃᒪᑐᐃᓐᓇᖅ ᑎᒥᒥᒃ ᐊᒥᓱᐃᑎᒍᑦ ᐃᑲᔪᕐᓯᓯᒪᑦᓯᐊᓂᖓ.
10:00 ᐊᒻᒪᓗᑭᑕᐅᓕᖓᔪᑦ ᐅᖃᐅᓯᖃᕐᓱᑎᒃ ᐅᓪᓗᒥ ᐊᑑᑎᓂᐊᓕᕐᒥᔭᒥᓂᒃ.
10:30 ᐊᓃᖕᖑᐊᑐᑦ
ᐱᒻᒪᕆᐅᕗᑦ ᑲᒃᑲᓛᑦ ᐊᓃᖕᖑᐊᑎᑕᐅᕙᒋᐊᖃᕐᓂᖏᑦ ᐊᓂᕐᑎᕆᑦᓯᐊᓇᕐᑐᒦᑦᑎᑫᓐᓇᖃᑦᑕᓗᒋᑦ ᑕᙯᕐᓯᒋᐊᖃᓕᕈᑎᒃ ᓯᓂᑫᓐᓇᕆᐊᖃᓕᕈᑎᒃ ᓄᓪᓚᖓᑦᓯᐊᓂᐊᕐᒪᑕ.
11:30 ᐃᕐᕈᑐᕐᑐᑦ ᐅᓪᓗᒍᒥᑕᖕᖏᓂᕐᒥᓂ.
12:00 ᖁᕐᕕᑐᕐᖄᑐᑦ ᑕᙯᕐᓯᖏᓐᓂᒥᓂ.
ᐱᒻᒪᕆᐅᕗᖅ ᑲᒃᑲᓛᑦ ᖁᕐᕕᑐᕇᕈᑎᒃ ᑕᒫᑦ ᐃᕐᕈᑐᑦᓯᐊᖃᑦᑕᕆᐊᖃᕐᓂᖏᑦ ᖃᓂᒻᒪᑲᑦᑕᖏᓐᓂᓴᐅᖁᓗᒋᑦ.
1:00 ᑐᐸᑦᑐᑦ ᐱᖕᖑᐊᓯᑦᓱᑎᒃ ᓂᐯᑐᕈᑎᓂᒃ
ᐱᒻᒪᕆᐅᕗᖅ 1 ᐃᑲᐅᕐᓂᐅᑉ ᐅᖓᑖᓄᑦ ᓯᓂᑦᑎᑕᐅᖃᑦᑕᕆᐊᖃᖕᖏᓂᖏᑦ ᑲᒃᑲᓛᑦ ᐃᓚᖏᑦ ᐅᓐᓄᑐᒃᑯᑦ ᓯᓂᓯᒍᓐᓇᖏᐅᒪᓲᒍᓂᖏᑦ ᐱᑦᔪᑎᒋᑦᓱᒋᑦ ᐅᓐᓄᐊᖄᖃᑦᑕᕆᐊᖃᖕᖏᓂᖏᑦ ᐱᒻᒪᕆᐅᒻᒪᑕ ᐃᓗᓯᕐᓱᓯᐊᕈᑎᑦᓴᖏᓐᓄᑦ ᓯᓂᑦᓯᐊᖃᑦᑕᓂᖏᑦ ᐃᓚᒋᔭᐅᒻᒥᒪᑕ.
2:30 ᐃᕐᕈᑐᕐᑐᑦ ᐅᖁᒻᒥᓗᖕᖏᓂᕐᒥᓂ
3:00 ᑭᒍᑎᓂᑦᓴᑐᑦ
3:30 ᐸᕐᓀᑕᐅᓯᒪᔪᓂᒃ ᓱᖃᑦᓯᑎᑕᐅᔪᑦ
ᐱᒻᒪᕆᐅᕗᖅ ᐃᓚᐅᑎᑦᓯᖃᑦᑕᕆᐊᖃᕐᓂᖅ ᐊᓕᐊᓇᕐᑐᖑᐊᓂᒃ, ᕿᓚᓈᕐᓇᑐᓂᒃ ᐱᖕᖑᐊᑎᑦᓯᖃᑦᑕᕆᐊᒥᒃ ᑌᒪᖕᖓᑦ ᓱᖃᑦᓯᑎᑕᐅᒍᑎᖏᑦ ᑌᒣᑦᑑᑎᑕᐅᖏᓐᓇᓗᑎᒃ ᐃᓱᒪᒋᓗᒋᑦ ᓄᓪᓚᖓᓂᕐᓴᐅᒍᓐᓇᓂᖏᑦ ᐅᓪᓗᓯᐅᕐᓂᒥᓂ ᐊᕐᓕᐊᑎᑕᐅᖃᑦᑕᕈᑎᒃ ᐊᒻᒪᓗ ᐱᖕᖑᐊᓂᒃᑯᑦ ᐃᓕᑦᓯᕙᓪᓕᐊᓲᒍᓂᖏᑦ.
4:30 ᐱᖕᖑᐊᓂᒃ ᐃᓂᖏᓐᓅᙯᔪᑦ
5:00 ᐊᖓᔪᕐᑳᒥᓄᑦ ᐁᔭᐅᕐᖃᑐᑦ
ᑖᒃᑯᐊ ᓱᓇᓱᐊᕐᓂᖏᑦᑕ ᓈᒻᒪᓯᑦᑕᐅᑎᖏᑦ ᐋᕐᕿᒋᐊᕐᑕᐅᒪᓲᒍᒻᒥᔪᑦ ᑲᒃᑲᓛᑦ ᐃᓕᒃᑰᑎᕐᑐᑦ ᑭᖕᖒᒪᔭᖏᑦ ᐃᑉᐱᒋᑦᓱᒋᑦ ᐊᒻᒪᓗ ᐅᓪᓗᓕᒫᖅ ᐊᑑᑎᒋᐊᖃᕐᐸᑕᖏᑦ ᐊᑦᔨᒌᖕᖏᑑᑐᐃᓐᓇᕆᐊᖃᓲᒍᑦᓱᑎᒃ.
ᓄᑕᕃᑦ ᐊᒻᒪᓗ ᐱᓱᒋᐅᕐᓴᑐᑦ ᑭᒡᒐᑐᕐᑕᐅᒍᑎᖓ
ᓄᑕᕃᑦ ᐊᒻᒪᓗ ᐱᓱᒋᐅᕐᓴᑐᑦ ᓇᓪᓕᓇᕐᑐᒪᕆᐅᕗᑦ ᐊᒻᒪᓗ ᐊᓐᓂᓇᒻᒪᕆᑦᓱᑎᒃ ᐯᕆᑦᓯᕕᒻᒥ. ᓄᑕᕋᕐᓄᑦ ᑐᕌᖓᔪᑦ ᐃᓕᓐᓂᐊᑎᑦᓯᓂᕐᓄᑦ ᑭᒡᒐᑐᕈᑎᒃ ᓇᓗᓀᕐᑕᐅᑫᓐᓇᑐᖅ ᐊᑑᑎᑎᑕᐅᓲᒍᒻᒥᔪᖅ, ᑭᓯᐊᓂ ᓱᖃᑦᓯᑎᑕᐅᒍᑎᖏᑦ ᐊᒻᒪᓗ ᑲᒪᒋᔭᐅᒍᓯᖏᑦ ᐋᕐᕿᒋᐊᕐᑕᐅᓯᒪᓲᑦ ᐃᑉᐱᒋᑦᓱᒋᑦ ᐱᕙᓪᓕᐊᓂᕐᒥᓂ ᐅᑭᐅᖏᑦ. ᐅᓪᓗᑕᒫᑦ ᐃᓅᓯᖏᓐᓂ ᓱᖏᐅᑎᓯᒪᔭᕐᒥᓂᒃ ᓱᖃᑦᓯᑎᑕᐅᕙᓐᓂᖏᑦ ᖃᓄᑐᐃᓐᓈᕈᓐᓀᑎᓪᓗᒋᑦ ᐊᖏᔪᒻᒪᕆᐅᕗᑦ.
ᑎᒥᖏᑦᑕ ᓴᓗᒪᑦᓯᐊᓂᖏᑦ
ᑐᕌᒐᖅ: ᑲᒃᑲᓛᖅ ᐊᒻᒪᓗ ᐊᕙᑎᖓ ᓴᓗᒪᑎᑕᐅᖏᓐᓇᕆᐊᖃᐴᒃ.
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᓇᖏᓕᕐᑐᓗᒋᑦ ᓇᖏᖏᑦ ᓴᓗᒪᒍᓐᓀᐸᑕ ᐊᒻᒪᓗ ᓄᑕᕋᖅ ᐃᕐᒥᓗᒍ
- ᐊᓐᓄᕌᖏᑦ ᓴᓗᒪᒍᓐᓀᐸᑕ ᐊᓯᖏᓐᓂᒃ ᐊᑎᑎᓗᒋᑦ
- ᑲᒃᑭᖃᑦᑕᓗᒋᑦ, ᑮᓇᕐᓂᐊᖃᑦᑕᓗᒋᑦ ᐊᒡᒐᖏᓪᓗ ᐃᕐᕈᑐᕐᓗᒋᑦ ᓂᕆᒌᕐᐸᑕ
- ᖁᐱᕐᕈᐊᕈᓰᔭᐅᑏᑦ ᐊᕙᑎᖏᓐᓂᒃ ᓈᒻᒪᓯᐊᕐᑐᑦ ᐊᑑᑎᑎᖃᑦᑕᓗᒋᑦ
ᑲᒪᒋᔭᖃᕈᓰᑦ ᐊᒻᒪᓗ ᐱᐅᓯᖃᕐᕕᖃᕈᓰᑦ:
- ᐃᓘᓐᓀᓂᒃ ᐊᑑᑎᑎᑕᐅᕙᑦᑐᓂᒃ ᐱᓇᓱᐊᕋᑦᓴᓂᒃ ᑲᔪᓯᑎᑦᓯᕙᓪᓗᑎᒃ ᐊᓕᐊᓪᓗᑎᒃ ᐊᒻᒪᓗ ᓄᓪᓚᖓᓐᓇᓂᕐᒥᒃ ᐃᑉᐱᒍᓱᑦᑎᓯᓗᑎᒃ
ᓂᕿᑦᓯᐊᑑᒪᑎᑦᓯᓂᖅ
ᑐᕌᒐᖓ: ᓲᓱᒋᑦᓯᐊᓗᒋᑦ ᓂᕆᒋᐊᓕᖏᑦᑕ ᓈᒻᒪᓯᑦᑕᕈᑎᖏᑦ ᐊᒻᒪᓗ ᑲᒃᑲᓛᑦ ᐱᐅᓯᕐᓱᑐᐃᓐᓇᓱᑎᒃ ᑳᓐᓂᕆᓲᖏᑦ ᐃᑉᐱᒋᑦᓯᐊᓗᒋᑦ.
ᑲᒃᑲᓛᑦ ᐊᒫᒪᒋᐊᖃᕐᓂᖏᑦᑕ ᓱᖏᐅᓐᓂᖃᕈᑎᖏᑦ ᓲᓱᒋᑦᓯᐊᓗᒋᑦ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᓄᑕᕃᑦ ᐊᖓᔪᕐᖄᖏᑦ ᐅᖄᖃᑎᒋᕙᓪᓗᒋᑦ ᕿᑐᕐᖓᖏᑦᑕᓗ ᓱᖏᐅᑎᓯᒪᔭᖏᑦ ᐅᓪᓗᑕᒫᕐᓯᐅᑎᖏᑦ ᒪᓕᑦᑕᐅᕙᓪᓗᑎᒃ
- ᓄᑕᕃᑦ ᐊᖓᔪᕐᖄᖏᑦ ᕿᑐᕐᖓᖏᑦᑕ ᐅᓪᓗᓕᒫᖅ ᓱᒋᐊᖃᕐᓂᖏᑦᑕ ᓈᒻᒪᓯᑦᑕᕈᑎᖏᓐᓂᒃ ᐋᕐᖀᖁᓗᒋᑦ
- ᐱᕕᖃᕐᐸᑦ ᓄᑕᕃᑦ ᓴᕐᓕᐊᓗᒋᑦ ᐊᒫᒪᑦᑎᐸᓪᓗᒋᑦ
- ᑲᒃᑲᓛᑉ ᖃᓄᐃᓐᓂᖓ ᐃᑉᐱᒋᒐᓱᐊᕐᓗᒍ ᐅᓪᓗᑕᒫᑦ ᐱᑕᑦᓯᑐᕐᐸᓗᒋᑦ ᓱᓂᕕᓂᖏᑦᑕ ᓇᓗᓀᕐᑕᐅᕕᖏᑦ ᐱᑕᑦᓯᑐᕐᓗᒋᑦ
- ᑲᒃᑲᓛᖅ ᐃᒻᒥᓂᕿᓗᓂ ᐊᐅᓚᑦᓯᒍᓐᓇᑎᕙᓪᓗᒍ ᓂᕆᔭᒥᓂᒃ, ᖃᓗᕋᐅᑎᒥᒃ ᐅᕝᕙᓘᓐᓃᑦ ᖃᓪᓗᑎᒥᒃ
- ᑲᒃᑲᓛᖅ ᓂᕿᓂᒃ ᐊᑦᔨᒌᖕᖏᑐᓂᒃ ᐆᑦᑐᕋᕐᑎᐸᓪᓗᒋᑦ
- ᑲᒃᑲᓛᖅ ᑐᓵᑎᕙᓪᓗᒍ ᓂᕿᐅᑉ ᐊᑎᖓᓂᒃ ᐊᒻᒪᓗ ᓱᓇᐅᒻᒪᖔᑦ ᓇᓗᓀᕐᓯᒍᑦᔨᓗᒍ
ᖁᕐᕕᑐᕆᐅᕐᓴᑎᑦᓯᓂᖅ
ᑐᕌᒐᖓ: ᑲᒃᑲᓛᖅ ᐃᑉᐱᒍᓱᑦᑎᐸᓪᓗᒍ ᐊᖒᕆᐊᖓ ᖁᐃᒋᐊᖓ ᐅᕝᕙᓘᓐᓃᑦ ᐊᓇᕆᐊᖓ.
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᖃᐅᔨᑎᒋᐊᕐᐸᓗᒋᑦ ᐊᓕᐊᓇᕆᐊᖓᓂᒃ ᓇᖏᕐᓯᒪᒋᐊᒥᒃ ᓴᓗᒪᔪᒥᒃ
- ᓇᖏᓕᕐᑕᐅᓯᔪᖅ ᓄᑕᕋᖅ, ᑕᑯᑎᕙᓪᓗᒍ ᓇᖏᐅᑉ ᓴᓗᒣᓐᓂᖓᓂᒃ
- ᓄᑕᕃᑦ ᐊᖓᔪᕐᖄᖏᑦ ᐃᑲᔪᕐᓯᒪᕙᖁᓗᒋᑦ ᖁᕐᕕᑐᕆᐅᕐᓴᑎᑕᐅᓕᕐᐸᑕ ᕿᑐᕐᖓᖏᑦ
ᑲᒪᒋᔭᖃᕈᓰᑦ ᐊᒻᒪᓗ ᐱᐅᓯᖃᕐᕕᖃᕈᓰᑦ:
- ᓇᖏᓖᒐᓱᐊᕐᑐᑦ ᑲᒪᒋᔭᖃᑦᓯᐊᓗᑎᒃ ᖁᐃᓇᕝᕙᓛᒍᓐᓀᓗᑎᒃ ᓇᖏᓖᒐᓱᐊᕐᐸᒋᐊᖃᕐᐳᑦ
- ᖁᕐᕕᑐᕆᐅᕐᓴᑎᑦᓯᔪᑦ ᐅᕈᓗᑐᐃᑦᑐᓯᐊᒍᒋᐊᖃᕐᐳᑦ
- ᑲᒃᑲᓛᖅ ᖁᕐᕕᑐᕈᒪᓕᕐᐸᑦ ᐊᓕᐊᒋᕙᓪᓛᓗᒍ ᐃᑲᔪᕐᓯᒪᑦᓯᐊᓗᒍ
ᓯᓂᓐᓇᖅ
ᑐᕌᒐᖓ: ᑲᒃᑲᓛᑉ ᐱᐅᓯᖓ ᒪᓕᓪᓗᒍ
ᑌᒪᖕᖓᓕᒫᖅ ᓯᓂᕝᕕᒋᓂᐊᕐᑕᖏᑦ ᓴᓗᒪᑦᓯᐊᒪᖔᑕ ᐃᑉᐱᒋᑦᓯᐊᐸᓪᓗᒋᑦ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑲᒃᑲᓛᖅ ᓯᓂᒐᓱᐊᖕᖏᓂᖓᓂ ᑎᒥᖓ ᐊᕐᓱᕈᕈᓐᓀᓴᕐᓗᒍ ᐅᓗᓪᓗᒍ
- ᓱᒃᑫᑐᔭᖅ ᓯᓂᒐᓱᐊᕈᑎᒃ ᑐᓴᕐᓂᔮᕈᑎᒃ ᓂᑦᔮᑎᓗᒍ
- ᓯᓂᕝᕕᒋᓂᐊᕐᑕᖏᑦᑕ ᓴᓂᐊᓂ ᓂᕕᖓᔪᐊᐱᓐᓂᒃ ᐱᖕᖑᐊᓂᒃ ᑕᑯᓐᓇᒐᖃᕐᑎᓗᒋᑦ
ᑲᒪᒋᔭᖃᕈᓰᑦ ᐊᒻᒪᓗ ᐱᐅᓯᖃᕐᕕᖃᕈᓰᑦ: - ᑲᒃᑲᓛᑦ ᓯᓂᕝᕕᑯᕕᖓ ᐊᓂᕐᑎᕆᑦᓯᐊᓇᕈᑎᑕᖃᕐᑎᓗᒍ
- ᓯᓂᕝᕕᖏᑦ ᓴᓗᒪᑦᓯᐊᒪᖔᑕ ᐃᑉᐱᒋᑦᓯᐊᐸᓪᓗᒋᑦ ᐊᒻᒪᓗ ᐊᑦᑕᓀᑦᑑᒪᖔᑕ, ᑲᒃᑲᓛᖅ ᓯᓂᖕᖏᐸᑦ, ᐱᖕᖑᐊᕕᒻᒥ ᐱᖕᖑᐊᑎᓗᒍ ᐃᑉᐱᒋᔭᐅᑦᓯᐊᓗᓂ
- ᓄᑕᕋᖅ ᐊᒫᒪᐅᑎᖓᓂᒃ ᐁᑦᑐᓗᒍ ᓯᓂᒐᓱᐊᖕᖏᓂᖓᓂ
ᐃᓅᖃᑎᖃᑦᓯᐊᕆᐅᕐᓴᓂᖅ ᐊᒻᒪᓗ ᐃᑉᐱᒋᔭᒥᑎᒍᑦ ᐱᕙᓪᓕᐊᓂᖏᑦ
ᐁ. ᑲᒃᑲᓛᑦ ᐃᓅᖃᑎᒌᒋᐅᕐᓴᓂᖏᑦ
ᑐᕌᒐᖓ: ᒪᓂᒪᑎᓗᒍ ᑲᒃᑲᓛᑦ ᐊᕙᑎᖓ ᑲᔪᖏᕐᑐᐃᓇᕐᑐᖅ ᑲᒃᑲᓛᑦ ᑲᒪᒋᐅᑎᑦᓯᐊᕆᐅᕐᓴᓂᖏᓐᓂᒃ, ᐃᑲᔪᕐᓯᒪᓗᒋᑦ ᐃᓅᖃᑎᒌᑦᓯᐊᕆᐅᕐᓴᓂᖏᑎᒍᑦ ᐊᒻᒪᓗ ᐱᔪᒪᔭᒥᓂᒃ ᖃᐅᔨᑦᓴᖑᕐᑎᓯᒋᐅᕐᓴᑎᓗᒋᑦ.
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑲᒃᑲᓛᑦ ᓇᔪᒐᖓ ᐃᓕᓐᓇᑎᕆᐊᓕᕐᕿᐸᓪᓗᒍ ᐊᓯᑦᔨᑐᕐᐸᓗᒍᓗ ᐊᕆᐅᓐᓇᓂᐊᖕᖏᒪᑦ
- ᐊᑐᐃᓐᓇᖃᕐᑎᓗᒋᑦ ᐊᑦᔨᒌᖕᖏᑐᓂᒃ ᐊᑐᕋᑦᓴᖏᓐᓂᒃ (ᓯᒃᑭᑌᑦ, ᐱᖕᖑᐊᑦ, ᐊᓯᖏᓪᓗ)
- ᐃᑭᓪᓕᑎᕐᓯᒪᕙᓪᓗᒋᑦ ᐅᑕᕐᕿᒋᐊᖃᕐᓂᖏᑦ ᐅᕝᕙᓘᓐᓃᑦ ᐃᓱᒫᓗᒍᓐᓇᓯᑎᑦᑌᓕᕙᓪᓗᒋᑦ
- ᑲᒃᑲᓛᒍᖃᑎᒌᓂ ᑲᒪᑦᓯᐊᓂᖅ ᐱᐅᓯᖃᕐᕕᖃᑦᓯᐊᓂᖅ ᐊᒻᒪᓗ ᓲᓱᑦᓴᓯᐊᕐᓂᖅ ᐊᑑᑎᑎᑕᐅᑦᓯᐊᓂᖃᕐᑎᓗᒍ
ᐯ: ᐃᓄᒻᒪᕇᑦ ᑲᒃᑲᓛᓪᓗ ᐃᓅᖃᑎᒌᒋᐅᕐᓴᓂᖏᑦ
ᑐᕌᒐᖓ: ᖃᓄᓕᒫᖅ ᐃᓚᐅᕕᒋᑦᓯᐊᖃᑦᑕᓗᒋᑦ ᐱᔪᓐᓇᕕᓕᒫᒥᒍᑦ ᑲᒃᑲᓛᑦ ᓱᖃᑦᓯᔪᑦ ᐱᖕᖑᐊᑐᓘᓐᓃᑦ.
ᑲᒃᑲᓛᑉ ᐊᖓᔪᕐᖄᖓᑎᑐᑦ ᐃᓘᓐᓇᑎᒃ ᓇᓪᓕᒋᓗᒋᑦ ᓲᓱᒋᑦᓯᐊᓗᒋᓗ.
ᐊᓯᖏᑦ ᐃᓄᒻᒪᕇᑦ ᑲᒃᑲᓛᓂᒃ ᐃᓘᓐᓀᓂᒃ ᐱᖕᖑᐊᖃᑎᖃᕈᓐᓇᓯᐊᕐᑎᓗᒋᑦ ᑲᔪᖏᕐᑐᐸᓪᓗᒋᑦ ᐃᓕᓴᕐᕕᖓᓃᖃᑕᐅᒍᓐᓇᓯᖁᓗᒋᑦ.
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᖁᖓᖃᑦᑕᓗᒋᑦ
- ᐱᐅᓯᖃᑦᓯᐊᕕᒋᓗᒋᑦ ᐊᑦᑕᕆᓗᒋᑦ ᐊᒻᒪᓗ ᑲᒪᒋᑦᓯᐊᓗᒋᑦ
- ᓂᐱᕆᑦᑑᒍᓐᓀᓗᑎᑦ ᐅᖄᕕᒋᖃᑦᑕᓗᒋᑦ
- ᐱᖕᖑᐊᖃᑎᒋᖃᑦᑕᓗᒋᑦ
- ᐊᖓᔪᕐᖄᖏᑦ ᐁᓯᒪᑎᒐᓱᐊᑦᓯᐊᐸᓪᓗᒋᑦ ᐱᔪᓐᓇᕕᓕᒫᒥᓄᑦ ᑲᒃᑲᓛᓃᑫᓐᓇᕆᐊᕐᑐᐸᖁᓗᒋᑦ
- ᐃᑉᐱᒋᑦᓯᐊᐸᓪᓗᒋᑦ ᐊᒻᒪᓗ ᖃᐅᔨᒣᓐᓇᓯᐊᕋᓱᐊᕐᐸᓗᒋᑦ ᓱᒍᒪᒻᒪᖔᑕ
- ᐅᐃᒪᑐᐃᑦᑐᓯᐊᕕᒋᕙᓪᓗᒋᑦ ᐊᒻᒪᓗ ᐅᕈᓗᑐᐃᑦᑑᓯᐊᕐᕕᒋᓗᒋᑦ
ᓄᑭᕐᓚᖏᑦᑕ ᐱᕈᕐᐸᓕᐊᓂᖏᑦ
ᑐᕌᒐᖓ: ᐱᕙᓪᓕᐊᑎᒋᐊᕐᓗᒋᑦ ᐊᒻᒪᓗ ᐃᑉᐱᒍᓱᑦᑎᕙᓪᓕᐊᒐᓱᐊᕐᓗᒋᑦ ᑎᒥᓕᒫᒥᓂᒃ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑎᒥᖏᑎᒍᑦ ᐃᙯᓕᓴᕐᑎᓯᓂᖅ
- ᑕᕐᕋᑑᑎᐅᑉ ᓵᖓᓂ ᐊᓪᓕᓂᕐᒦᑎᓗᒍ ᑲᒃᑲᓛᖅ ᑎᒥᒥᑕ ᖃᓄᐃᓕᖓᓕᕐᓂᖓᓂᒃ ᐃᑉᐱᒍᓱᒋᐅᕐᓴᑎᓗᒍ
- ᑲᒃᑲᓛᖅ ᐃᑲᔪᕐᓯᐸᓪᓗᒍ ᑎᒥᖓ ᑕᙯᕐᑎᒋᐊᕐᓗᒍ ᐅᓗᓪᓗᒍ ᓄᓪᓚᓚᖓᒻᒪᑦ
- ᑲᒃᑲᓛᖅ ᑎᒥᒥᓂᒃ ᐊᑐᕆᐅᕐᓴᑎᕙᓪᓗᒍ ᐱᖕᖑᐊᓂᒃ ᐊᑯᐃᒋᐅᕐᓴᑎᓗᒍ, ᐅᕝᕙᓘᓐᓃᑦ ᐱᖕᖑᐊᓂᒃ ᐊᑐᖕᖑᐊᑎᕙᓪᓗᒍ ᑎᒥᖓᑕ ᑕᓯᑎᕈᓐᓇᓯᐅᑎᖏᓐᓂᒃ ᑕᓕᕐᒥᓄᑦ ᐃᑕᒐᒻᒥᓄᓗ
- ᐱᖕᖑᐊᖃᕐᑎᐸᓪᓗᒋᑦ ᓱᓇᑐᐃᓐᓇᓂᒃ ᑭᕕᒍᓐᓇᑕᖏᓐᓂᒃ ᐃᒻᒥᓂᕿᓗᑎᒃ
ᓄᑭᐊᕈᖏᑦᑕ ᐱᕈᕐᐸᓕᐊᓂᖏᑦ
ᑐᕌᒐᖓ: ᐊᒡᒐᒥᓄᑦ ᐊᐅᓚᑦᓯᒋᐅᕐᓴᓂᖅ ᐊᒻᒪᓗ ᓱᓇᑐᐃᓐᓇᓂᒃ ᑎᒍᒻᒥᑐᕆᐅᕐᓴᓂᖅ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑎᒍᒥᐊᕐᑐᑦ, ᖃᐅᔨᓴᕐᑐᑦ, ᑎᒍᓯᔪᑦ ᐊᒻᒪᓗ ᐃᒋᑦᓯᔪᑦ ᐱᖕᖑᐊᒥᒃ (ᐸᑦᑕᒥᒃ ᒥᑭᔪᒥᒃ)
- ᑲᒃᑲᓛᑉ ᓇᔪᕐᑕᖓᓂᑦ ᓅᑦᑎᓗᒍ ᐊᒻᒪᓗ ᖃᓄᐃᓕᖓᒍᓯᖓ ᐊᓯᑦᔨᓗᒍ
- ᑲᒃᑲᓛᖅ ᐊᐅᓚᑦᓯᒋᐅᕐᓴᑎᓗᒍ ᖃᓗᕋᐅᑎᒥᒃ ᐊᑐᑦᓯᐊᕆᐅᕐᓴᓗᓂ, ᐴᒍᑕᕐᒥᒃ ᐅᕝᕙᓘᓐᓃᑦ ᐃᒥᕈᑎᒥᒃ ᓯᖁᒥᕐᖃᔭᖕᖏᑐᒥᒃ
- ᐃᓕᒪᔪᓂᒃ ᒥᓗᐃᒋᐅᕐᓴᑎᓗᒍ ᐊᒻᒪᓗ ᐱᖕᖑᐊᓂᒃ ᓂᒪᕐᑎᓯᒋᐅᕐᓴᑎᓗᒍ
- ᐸᑎᐊᕈᑎᖕᖑᐊᓂᒃ ᓴᓇᒋᐅᕐᓴᑎᓗᒍ
- ᐊᒡᒐᒥᓄᑦ ᒥᖑᐊᕆᑎᓗᒍ ᐅᕝᕙᓘᓐᓃᑦ ᐊᖏᔪᒧᑦ ᒥᖑᐊᕐᓯᐅᑎᒧᑦ
- ᓯᑯᑦᓴᔭᒥᒃ ᐊᓕᑦᑐᐃᑎᓗᒍ
- ᐱᖕᖑᐊᓂᒃ ᑫᓪᓗᐊᑎᓗᒍ ᐱᖑᔭᕐᓗᒋᓗ
- ᐱᖕᖑᐊᓂᒃ ᖁᓕᐊᕇᑦᑐᓕᐅᕐᑎᓗᒍ ᐊᒻᒪᓗ ᐋᑉᕿᓯᒪᔪᓕᐅᕐᑎᓗᒍ
ᐃᓱᒪᖓᑕ ᐱᕈᕐᐸᓕᐊᓂᖓ
ᐁ: ᐃᕐᖃᐅᒪᒍᓐᓇᓂᖅ
ᑐᕌᒐᖓ: ᐱᕙᓪᓕᐊᑎᑦᓯᐅᑏᑦ ᑕᑯᓐᓇᑕᒥᑎᒍᑦ ᑐᓵᓂᕐᒥᑎᒍᓪᓗ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᐃᖕᖏᖑᐊᕈᓰᑦ, ᐱᖕᖑᐊᑦ ᐃᖃᐅᒪᒋᐅᕐᓴᐅᑏᑦ
- ᑐᓴᕐᓂᔮᕐᑎᓯᐅᑏᑦ ᓴᓇᕐᕈᑏᑦ
- ᐊᕙᑎᒥᒃ ᓇᓗᓀᕐᓯᒋᐅᕐᓴᐅᑏᑦ
- ᐃᑦᔪᐊᖃᑦᑌᓃᑦ ᐆᒪᔪᓂᒃ ᐅᕝᕙᓘᓐᓃᑦ ᓱᓇᑐᐃᓐᓀᑦ ᓂᐸᖏᓐᓂᒃ
- ᑲᒃᑲᓛᒥᒃ ᐊᐱᕐᓲᑏᑦ
ᐯ: ᐅᖃᐅᓯᖅ
ᑐᕌᒐᖓ: ᑲᒃᑲᓛᖅ ᐅᖃᕈᓐᓇᓯᓯᒪᖁᓲᕗᑦ ᑕᓪᓕᒪᐅᔪᕐᑐᑦ ᓴᓂᐊᓃᑦᑐᓂᒃ ᐅᖃᐅᓯᕐᓂᒃ 18-ᓂᒃ ᑕᕐᕿᖃᓕᕐᓗᑎᒃ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑌᒪᖕᖓᑦ ᑲᒃᑲᓛᑉ ᐊᑎᖓ ᐅᖃᕐᐸᓗᒍ
- ᐃᓕᓴᕐᕕᐅᑉ ᐃᓗᐊᓃᑦᑐ ᐊᒥᓱᑦ ᐊᑎᖏᑎᒍᑦ ᑌᕙᓪᓗᒋᑦ
- ᑎᒥᖏᑦᑕ ᓱᓇᐅᓂᖏᑦ ᓇᓗᓀᕐᐸᓗᒋᑦ ᐊᑎᖏᑎᒍᑦ
- ᑲᒃᑲᓛᑦ ᐱᖕᖑᐊᑎᕙᓪᓗᒋᑦ ᓂᐯᑦ ᐊᑐᕐᓗᒋᑦ
ᑌ: ᑕᑯᓐᓇᓂᖅ, ᑐᓵᓂᖅ, ᓀᒪᓂᖅ, ᐃᑉᐱᒍᓱᓐᓂᖅ, ᓀᒪᓂᕐᓗ ᐆᑦᑐᓗᒍ
ᑐᕌᒐᖓ: ᐃᑉᐱᒍᓲᑎᓕᒫᖏᑦ ᑲᒃᑲᓛᑉ ᖃᓄᓕᒫᖅ ᐱᕙᓪᓕᐊᑎᒋᐊᕐᓗᒋᑦ
ᐱᓇᓱᐊᕋᑦᓭᑦ ᑲᒪᒋᔭᐅᒍᓐᓇᑐᑦ:
- ᑲᒃᑲᓛᖅ ᓇᓗᓀᕐᓯᖃᑎᒋᕙᓪᓗᒍ ᓄᑖᓂᒃ ᐊᑎᖏᑎᒍᑦ ᓱᓇᑐᐃᓐᓇᓂᒃ
- ᑲᒃᑲᓛᖅ ᑲᔪᖏᕐᑐᐸᓪᓗᒍ ᐆᑦᑐᑎᓗᒍ ᓄᑖᓂᒃ ᓂᕿᓂᒃ ᐱᓚᐅᕐᓯᒪᖕᖏᑕᖏᓐᓂᒃ ᐆᑦᑐᕋᕐᑎᓗᑎᑦ ᐃᓕᓐᓂᒃ ᐃᑦᔭᓯᑎᒋᐊᕐᓗᒍ
- ᐊᑦᔨᒌᖕᖏᑐᓂᒃ ᓱᓇᑐᐃᓐᓇᓂᒃ ᐊᑦᑐᐃᑎᕙᓪᓗᒍ (ᐊᕿᑦᑐᖅ, ᓯᑎᔪᖅ...)
- ᓇᓗᓀᕐᓯᖃᑎᒋᕙᓪᓗᒍ ᐊᑦᔨᒌᖕᖏᑐᓂᒃ ᓂᐸᓕᔭᕐᑐᓂᒃ
ᐅᓪᓗᑕᒫᕐᓯᐅᑎᖏᑦ ᓄᑕᕃᑦ ᐊᒻᒪᓗ ᐱᓱᒋᐅᕐᓴᑐᑦ ᐆᑦᑑᑏᑦ:
8:30 ᕿᑐᕐᖓᕇᑦ ᐃᑎᐅᕐᖃᑐᑦ ᑐᖕᖓᓱᑦᑎᑕᐅᔪᑦ
ᐱᒻᒪᕆᐅᕗᖅ ᑲᒃᑲᓛᑉ ᐱᒋᐅᕐᓴᑎᑦᓯᔨᖓᑕ ᐱᓇᓱᕝᕕᒥᓃᑦᓴᐅᑎᒋᒋᐊᖃᕐᓂᖓ ᑲᒃᑲᓛᑦ ᐃᑎᐅᕐᖃᑎᓗᒋᑦ ᐊᒻᒪᓗ ᑐᖕᖓᓱᑦᑎᓯᓗᓂ ᐯᕆᑦᓯᕕᒻᒦᓂᕐᒥᓂ ᐃᓱᕐᕆᓂᕐᓴᐅᓂᐊᕐᒪᑕ ᐃᑎᕐᓯᒪᑦᓴᐅᑎᒋᖕᖏᓂᖓᓄᑦ ᖃᓄᐃᓕᖕᖓᑕᐅᓯᒪᒍᓐᓇᒪᑕ.
9:00 ᐊᒡᒑᐱᖏᑦ ᐃᕐᕈᑐᕐᖄᓗᒋᑦ ᐅᓪᓛᕈᒥᑕᓂᐊᕐᒪᑕ. ᐅᖄᕕᒋᓗᒋᑦ ᓂᕆᓂᖏᓐᓂ ᐅᓪᓗᓯᐅᑦᓯᐊᓂᕐᓴᐅᓂᐊᕐᒪᑕ.
10:00 ᐊᑦᑐᓗᒋᑦ ᓱᓇᐅᓂᖏᑦ ᐊᑦᔨᒌᖕᖏᑐᓂᒃ ᐱᖕᖑᐊᑐᑦ
ᐱᒻᒪᕆᐅᕗᖅ ᐱᓇᓱᐊᕐᑎᓯᒋᐊᒥᒃ ᓄᑕᕋᕐᓂᒃ ᐊᒻᒪᓗ ᐱᓱᒋᐅᕐᓴᑐᓂᒃ ᐃᑉᐱᒍᓲᑎᖏᑎᒍᑦ ᓴᐳᑦᔨᓯᒪᒍᓐᓇᑐᓂᒃ ᑕᑯᓐᓇᓂᒃᑯᑦ, ᓀᓂᒃᑯᑦ ᕿᖓᑎᒍᑦ ᖃᓂᑎᒍᓪᓗ, ᐊᑦᑐᐃᓂᒃᑯᑦ, ᑐᓵᓂᒃᑯᓗ ᓴᐳᑦᔨᓯᒪᔭᐅᕙᖕᖏᑯᑎᒃ ᐃᑉᐱᒍᓲᑎᖏᑦᑕ ᐱᕈᕐᐸᓕᐊᓂᖏᑦ ᖃᓄᓕᖕᖓᑕᐅᓯᒪᒍᓐᓇᒪᑕ ᐱᕈᕐᐸᓕᐊᓂᖏᑦ.
10:30 ᓂᒪᕐᓱᑎᒃ ᐱᖕᖑᐊᑐᑦ / ᓄᑭᕐᓚᒥᓂᒃ ᐊᑐᕐᓗᑎᒃ
ᐱᒻᒪᕆᐅᕗᖅ ᓄᑕᕃᑦ ᐊᒻᒪᓗ ᐱᓱᒋᐅᕐᓴᑐᑦ ᓄᑭᕐᓚᒥᓂᒃ ᐊᑐᕐᓗᑎᒃ ᐃᙯᓕᓴᕐᐸᒋᐊᖃᕐᓂᖏᑦ ᐱᓗᐊᒃᑐᒥᒃ ᑌᒣᓪᓗᐊᓕᕐᑎᓗᒋᑦ ᐱᑦᔪᑎᒋᑦᓱᒍ
11:00 ᓇᖏᓕᕐᑐᑌᑦ, ᖁᕐᕕᑐᕐᑎᑌᑦ ᐊᒻᒪᓗ ᐊᒡᒑᐱᖏᑦ ᐃᕐᕈᑐᕐᓗᒋᑦ.
ᐱᒻᒪᕆᐅᕗᖅ ᐊᒡᒑᐱᖏᑦᑕ ᐃᕐᕈᑐᕐᑕᐅᕙᒋᐊᖃᕐᓂᖏᑦ ᐃᕐᕈᑐᕐᓂᖅ ᐱᕙᓪᓕᖁᑎᑦᓯᐊᒍᓂᕐᐸᐅᒪᑦ ᖁᐱᕐᕈᐊᕈᓰᑦ ᓄᐃᑕᑎᑕᐅᑦᑌᓕᓂᖏᓐᓄᑦ ᐅᓄᕐᓯᕙᓪᓕᐊᑎᑕᐅᑦᑌᓕᓂᖏᓐᓄᑦ.
11:30 ᐅᓪᓗᒍᒥᑕᕐᑐᑦ ᐊᒻᒪᓗ ᓂᕆᒌᕈᑎᒃ ᑭᒍᑎᓂᑦᓴᑐᑦ
ᐱᒻᒪᕆᐅᕗᖅ ᓄᑕᕃᑦ ᑭᒍᑎᓂᑦᓴᑕᐅᖃᑦᑕᕆᐊᖃᕐᓂᖏᑦ ᐱᓗᐊᕐᑐᒥ ᐊᒫᒪᐅᑎᑐᕐᐸᑕ ᐊᒻᒪᓗ ᓯᓂᒐᓱᐊᖕᖏᓂᖏᓐᓂ ᐃᒪᑐᐃᓐᓇᒥᒃ ᑭᓯᐊᓂ ᐃᒥᕐᑎᐸᓪᓗᒋᑦ. 18-ᓂᒃ ᑕᕐᕿᖃᓕᕈᑎᒃ ᐅᖓᑖᓄᓗ ᐊᒫᒪᐅᑎᒧᑦ ᐊᒫᒪᓲᒍᒍᓐᓀᕆᐊᓖᑦ.
12:00 ᓯᓂᒐᓱᐊᕐᑐᑦ
1:30 ᓇᖏᓕᕐᑐᑌᑦ, ᖁᕐᕕᑐᕐᑎᑌᑦ ᐊᒻᒪᓗ ᐊᒡᒑᐱᖏᑦ ᐃᕐᕈᑐᕐᓗᒋᑦ.
2:00 ᐅᖁᒻᒥᓗᑦᑐᑦ
2:30 ᐊᒡᒑᐱᖏᑦ ᐃᕐᕈᑐᕐᓗᒋᑦ ᐊᒻᒪᓗ ᓴᓗᒻᒪᓴᕐᓗᒋᑦ.
ᐱᒻᒪᕆᐅᕗᖅ ᓄᑕᕃᑦ ᓴᓗᒪᑎᑕᐅᖏᓐᓇᕆᐊᖃᕐᓂᖏᑦ ᐊᒻᒪᓗ ᑲᒃᑭᖃᑦᑕᓗᒋᑦ ᓄᐃᑎᕐᓂᐊᖏᒻᒪᑕ ᐊᓕᐊᓇᖕᖏᑐᑦ ᖁᐱᕐᕈᐊᕈᐃᑦ.
3:00 ᐊᓃᖕᖑᐊᑐᑦ
ᐱᒻᒪᕆᐅᕗᖅ ᓄᑕᕃᑦ ᐊᓂᙯᓐᓇᑎᑕᐅᖃᑦᑕᕆᐊᖃᕐᓂᖏᑦ 5-ᒥᓂᑦᓯᕈᐊᓂᓘᓐᓃᑦ.
ᓯᓚᒥᒃ ᐊᓂᕐᑎᕆᑦᓯᐊᓇᕐᑐᒥᒃ ᓀᑎᑕᐅᖃᑦᑕᕆᐊᓖᑦ ᐃᓕᑦᓯᕙᓪᓕᐊᓂᖏᓐᓂᒃ ᐱᕙᓪᓖᓯᒪᐅᑕᐅᒍᓐᓇᒪᑦ ᐊᒻᒪᓗ ᖃᓄᓕᒫᖅ ᐱᕈᕐᐸᓕᐊᓂᖏᓐᓂᒃ.
3:30 ᓇᖏᓕᕐᑐᑌᑦ, ᖁᕐᕕᑐᕐᑎᑌᑦ ᐊᒻᒪᓗ ᐊᒡᒑᐱᖏᑦ ᐃᕐᕈᑐᕐᓗᒋᑦ.
ᐱᒻᒪᕆᐅᕗᖅ ᓇᖏᓕᕐᑕᐅᑲᐱᖃᑦᑕᕆᐊᖃᕐᓂᖏᑦ ᓴᓗᒣᑦᑐᒦᑯᑖᕐᑎᑌᓕᓗᒋᑦ ᐊᒻᒪᓗ ᓇᖏᓕᕆᐊᖃᓕᕐᒪᖔᑕ ᖃᐅᔨᒐᓱᐊᑲᐱᖃᑦᑕᓗᒋᑦ ᐆᑎᕐᑐᐊᓚᕿᓂᐊᖕᖏᒪᑕ. ᖁᕐᕕᑐᕆᐅᕐᓴᓯᒍᑎᓗ ᐱᕙᓪᓕᓯᒪᑦᓴᐅᑎᒋᖁᒧᑦ.
4:00 ᐅᓂᒃᑳᖑᐊᕐᕕᐅᔪᑦ
ᐱᒻᒪᕆᐅᕗᖅ ᐅᓂᒃᑳᖑᐊᕐᕕᐅᖃᑦᑕᕆᐊᖃᕐᓂᖏᑦ ᐅᖃᕆᐅᕐᓴᓂᖏᑎᒍᑦ ᐃᑲᔪᕐᓯᒪᒍᓐᓇᒪᑦ ᐅᖄᕕᐅᖃᑦᑕᑐᐊᕋᒥᒃ ᐅᖃᕆᐅᕐᓴᓂᖏᑦ ᐱᕙᓪᓕᑕᐅᓯᒪᒍᓐᓇᒪᑕ.
4:15 ᐃᓱᒪᒥᑦᑐᑦ
4:45 ᐱᖕᖑᐊᓂᒃ ᓴᓇᕐᕙᐅᙯᔪᑦ
5:00 ᐊᖓᔪᕐᖄᒥᓄᑦ ᐁᔭᐅᔪᑦ
ᑖᒃᑯᐊ ᓈᒻᒪᓯᑦᑕᐅᑏᑦ ᐋᕐᕿᒋᐊᕐᑕᐅᓯᒪᓲᑦ ᓄᑕᕃᑦ ᐃᓕᒃᑰᑎᕐᑐᑦ ᑭᖕᖒᒪᔭᖏᑦ ᐃᑉᐱᒋᑦᓱᒋᑦ ᐊᒻᒪᓗ ᓱᓇᓱᐊᕐᑎᑕᐅᓂᖏᑦ ᐊᑦᔨᒌᖕᖏᑑᒍᓐᓇᓱᑎᒃ ᑲᒪᒋᔭᐅᒋᐊᓖᑦ ᒪᓕᑦᓱᒋᑦ.
