ᓱᖃᑦᓯᓃᑦ
ᐱᖕᖑᐊᖃᑎᖃᕐᓂᖅ
ᐅᑯᐊ ᐃᓱᒪᑦᓴᓯᐅᕈᑎᑦᓭᑦ ᐃᓚᖏᑦ ᖃᓄᖅ ᑲᒃᑲᓛᓂᒃ ᐱᖕᖑᐊᖃᑎᖃᕈᓐᓇᒪᖔᕐᐱᑦ. ᐱᖕᖑᐊᑦ ᑭᖕᖒᒪᓇᖕᖏᑐᑦ ᑖᒃᑯᓇᓂ!
0-ᒥᑦ 12-ᒧᑦ ᑕᕐᕿᓖᑦ
- ᓂᒪᕐᑎᓯᖕᖑᐊᓂᖅ:
ᓄᑕᕋᖅ ᑎᒍᒥᐊᕐᓗᒍ ᐃᖕᖏᓗᑦᑖᕕᒋᓗᒍ, ᑲᒃᑲᓛᕐᓯᐅᑎᓂᒃ ᑐᓵᑎᖕᖑᐊᓗᒍ ᐅᕝᕙᓘᓐᓃᑦ ᑖᓂᓯᖃᑎᒋᓗᒍ. - ᐯᓯᑰᖕᖑᐊᓴᕐᑎᓗᒍ:
ᓇᖏᓕᕋᓱᐊᕐᓗᒍ, ᓄᑕᕋᐅᑉ ᓂᐅᖏᒃ ᓂᒪᕐᑎᓗᒋᒃ ᐯᓯᑰᕐᑐᑎᑐᑦ. - ᐊᓕᐊᓀᑦᑐᖅ ᐃᔪᕐᓵᑎ:
ᐃᔪᕐᓵᓗᒍ, ᐃᔩᒃᑭᒃ ᐅᐃᑦᑕᓛᕐᑎᓗᒋᒃ, ᐅᓗᐊᒃᑭᒃ ᐳᕕᓪᓛᑎᓗᒋᒃ, ᓄᓇᓯᐅᑎᐅᑉ ᐊᐅᓚᐅᑎᕐᕙᓛᖓᓂᒃ ᐃᑦᔭᓯᓗᑎᑦ ᓂᑦᔮᕕᒋᓗᒍ. - ᐊᓯᐅᑦᑕᖑᐊᕐᕕᒋᓗᒍ ᐊᐸᑳᕐᕕᒋᓗᒍ:
ᐊᒡᒐᓅᕕᑦ ᑮᓀᑦ ᐊᓯᐅᑦᑕᑎᓗᒍ, ᕿᐱᒻᒧᓘᓐᓃᑦ, ᐊᓪᓚᕈᑎᐊᐱᒧᓪᓘᓃᑦ. ᓄᑕᕌᐲᑦ ᑌᒣᓘᕐᑐᓂᒃ ᐊᓕᐊᑦᑐᒪᕇᑦ. - ᓂᐲᑦ ᐊᑦᔨᐅᖏᓪᓕᑕᕐᑐᖅ:
ᓂᐲᑦ ᖃᑎᑭᓪᓕᖃᑦᑕᑎᓪᓗᒍ ᐅᕝᕙᓘᓐᓃᑦ ᖃᑎᑦᑐᑎᖃᑦᑕᓗᒍ ᓴᓐᑎᑲᓛᓯᑦᑎᑐᑦ. - ᐃᖕᖏᑎ ᐊᔪᒉᓪᓕᑕᕐᑐᖅ:
ᐃᖕᖏᕕᒋᓗᒍ ᓱᑲᓐᓃᑦ ᓱᒃᙯᓃᓪᓗ ᐊᓯᑦᔨᑕᕐᑎᓗᒋᒃ (ᓱᒃᑫᑐᖅ, ᓱᑲᑦᑐᖅ) ᐊᒻᒪᓗ ᓂᐯᑦ ᐊᓯᑦᔨᑕᕐᓗᓂ (ᓂᐱᕐᖁᑐᖅ, ᓂᐱᑭᑦᑐᖅ). - ᑯᑭᑐᐊᓕᖕᖑᐊᖅ:
ᐃᑦᓯᕙᐅᑕᒥ ᐃᑦᓯᕙᓗᑎᑦ ᓄᑕᕋᖅ ᓴᕐᓕᐊᓗᒍ. ᑎᒍᒥᐊᕐᓗᒍ ᐊᒡᒐᓅᕕᑦ ᐅᓂᖏᑎᒍᑦ (ᐅᕝᕙᓘᓐᓃᑦ ᐊᒡᒐᖏᑎᒍᑦ ᓄᑭᖃᕐᓂᓴᐅᑉᐸᑦ) ᐊᒻᒪᓗ ᓂᐅᒃᑭᒃ ᓂᒪᕐᑎᓗᒋᒃ ᖁᒻᒧᑦ ᐊᒻᒧᑦ. ᑯᑭᑐᐊᓕᐅᑉ ᓂᑦᔮᕈᓯᖓᓂᒃ ᓂᑦᔮᓗᑎᑦ. ᓱᑲᓯᑦᑕᕈᓐᓇᒥᔪᑎᑦ ᓱᒃᑫᓕᑦᑕᓗᑎᓗ.
12-ᓂᑦ 24-ᒧᑦ ᑕᕐᕿᓖᑦ
- ᑎᒍᓯᕙᒋᑦ !:
ᐹᕐᖑᓗᑎᑦ ᑲᒃᑲᓛᖅ ᐅᓪᓚᓗᒍ. ᐃᔨᓐᓃᕕᑦ ᐃᔨᒋᒃ ᓇᓪᓕᖁᐊᖃᕐᐸᓃᒃ ᐊᓕᐊᒻᒪᕆᓚᖓᔪᖅ. ᕿᒫᔭᕐᑎᓗᒍ ᑎᒍᒍᕕᐅᒃ, ᑯᓂᓪᓗᒍ ᐃᕿᓪᓗᒍ. - ᒨᐆ ᒨᐆ!:
ᐆᒪᔪᐃᑦ ᓂᐱᖏᓐᓂᒃ ᐃᑦᔭᓯᓗᑎᑦ ᓂᑦᔮᕕᒋᓗᒍ. ᐊᓕᐊᒋᔭᖃᓲᑦ ᑌᒣᓘᕐᕕᐅᒋᐊᖅ ᓄᓇᒃᑰᔫᒥ ᐃᑯᒪᑦᓱᑎᒃ ᐅᕝᕙᓘᓐᓃᑦ ᑫᓪᓗᐊᕈᑎᒥ ᐃᑯᒪᑦᓱᑎᒃ. - ᐃᒪᖅ ᐊᕐᖁᓇᕐᑐᖅ:
ᓇᓪᓚᖓᓗᑎᑦ, ᓂᐅᒃᑭᒃ ᐃᕿᖓᑎᓪᓗᒋᒃ ᑲᒃᑲᓛᖅ ᐃᖏᑎᓗᒍ ᓰᕐᖁᓅᕕᑦ ᐊᒡᒐᖏᒍᑦ ᑎᒍᒥᐊᕐᓗᒍ. ᐊᕐᖁᓇᖅ ᑎᑭᕙᓪᓕᐊᓕᕐᐸᑦ, ᓂᐅᒃᑭᒃ ᓂᒪᕐᑎᓗᒋᒃ ᑲᒃᑲᓛᖅ ᐅᕕᕐᑌᓕᓚᖓᒻᒪᑦ. - ᓯᕙᓂᕈᑎᒃ:
ᓂᑯᕐᕋᓗᑎᑦ ᑲᒃᑲᓛᖅ ᑎᒍᒥᐊᕐᓗᒍ ᐅᓂᖏᑎᒍᑦ. ᓂᒪᕐᑎᓗᒍ ᓯᕙᓂᕈᑎᑎᑐᑦ ᐃᒣᓘᕐᓗᑎᑦ: ᑏᐄᖕ! ᑖᐋᖕ! - ᑮᓇᖅ ᐅᖄᔪᖅ:
ᑮᓀᑦ ᐊᑦᔨᐅᖏᓪᓕᑕᕐᑎᓗᒍ (ᓂᖓᕐᑐᖅ, ᐊᓕᐊᑦᑐᖅ, ᑲᕙᕐᑐᖅ, ᐃᓂᕐᑑᒪᔪᖅ, ᑕᖃᑦᑐᖅ, ᑕᑕᒥᑦᑐᖅ, ᐊᓯᖏᓪᓗ). ᑲᒃᑲᓛᖅ ᐊᐱᕐᓱᓗᒍ ᓱᓕᕐᒪᖔᑉᐱᑦ ᓇᓚᐅᑦᓯᓂᐊᕐᒪᖔᑦ. ᑲᒃᑲᓛᖅ ᑌᒣᓘᖔᖁᓯᒻᒥᓗᒍ. ᐃᓕᑦᓯᓯᐊᕈᓐᓇᑐᑦ ᓱᓕᕐᒪᖔᒻᒥᒃ ᖃᐅᔨᔭᐅᑎᒍᓐᓇᑐᑦ ᐅᖃᕐᖃᔭᖕᖏᑲᓗᐊᕋᒥᒃ.
2-ᓂᑦ 3-ᓄᑦ ᐅᑭᐅᓖᑦ
- ᐃᔨᕋᖕᖑᐊᑐᑦ:
ᑲᒃᑲᓛᓄᑦ ᐊᓕᐊᒋᔭᐅᒍᓐᓀᖃᔭᖕᖏᑐᖅ! - ᑲᒃᑲᓛᑦ ᑐᓴᕐᓂᔮᕈᓯᖏᑦ ᐅᖃᐅᓯᖕᖑᐊᑦ:
ᑲᒃᑲᓛᓄᑦ ᑕᒪᒃᑯᐊ ᐊᓕᐊᒋᔭᐅᔪᒻᒪᕇᑦ ᑕᖃᒋᔭᐅᓚᐅᕐᓯᒪᖕᖏᑐᑦ. ᑖᕗᖓᓕᒫᖅ ᓂᑦᔮᕈᑎᒋᒍᓐᓇᑕᖏᑦ. ᑎᒥᑎᒍᑦ ᒪᓕᖃᑦᑕᓗᒋᑦ ᐅᖃᕆᐅᕐᓴᐅᑎᑦᓴᔭᖏᑦ ᑲᒃᑲᓛᑦ ᐊᒻᒪᓗ ᑲᒃᑲᓛᑦ ᓄᑖᓂᒃ ᐅᖃᐅᓯᖕᖑᐊᓕᐅᕐᑎᒋᐊᖃᑦᑕᓗᒋᑦ. - ᐅᖄᒍᑎᒃᑯᑦ ᐅᖄᔪᑦ ᑐᑭᓕᕇᑦ:
ᐊᑕᐅᓯᖅ ᑲᒃᑲᓛᖅ ᓱᑲᑦᑑᓗᑎᑦ ᐅᖃᕐᕕᒋᓗᒍ. ᐊᓯᒥᓄᑦ ᑲᒃᑲᓛᒧᑦ ᑌᒫᑦᓭᓇᕆᐊᕐᓗᓂ ᐅᖃᕐᒥᑎᓗᒍ. ᑭᖑᓪᓕᐹᒥ, ᑲᒃᑲᓛᖅ ᐅᖃᐅᑎᔭᐅᔪᖅ ᑐᓴᕐᓴᓯᐊᒍᓗᓂ ᐅᖃᓚᖓᑎᓪᓗᒍ. ᑌᒪᖕᖓᑦ ᐊᑦᔨᐅᖏᓪᓕᖏᕐᖃᔭᖕᖏᑐᖅ ᐅᖃᕐᑕᕕᓃᑦ ᑭᖑᓪᓕᐹᒧᑦ ᐅᖃᕐᑕᐅᒐᒥ. - ᑕᕐᕋᑑᑎᒃ:
2 ᑲᒃᑲᓛᒃ ᓵᖕᖓᐅᑎᔫᒃ. ᐁᑉᐸᖓ ᖃᓄᑐᐃᓐᓇᖅ ᐱᐅᓯᓕᒃ ᐁᑉᐸᒥᓄᑦ ᐃᑦᔭᑕᐅᓚᖓᑦᓱᓂ. ᐆᑦᑑᑎᒃ: ᐊᒡᒐᒥᓂᒃ ᓂᐊᖁᕐᒥᓅᕐᓯᔪᖅ, ᐊᑕᐅᓯᕐᒧᑦ ᓂᐅᒥᓄᑦ ᓂᑯᕐᕋᔪᖅ, ᑮᓇᕐᒥᓄᑦ ᐃᔪᕐᓵᑐᖅ, ᐊᓯᖏᓪᓗ.
4-ᓂᒃ ᐅᑭᐅᓖᑦ ᐅᖓᑖᓄᓗ
- ᓂᕐᓯᐅᕕᒃ ᑐᑮᕈᑦᑐᖅ:
ᐃᓱᒪᒋᖕᖑᐊᓗᒋᑦ ᓂᕆᔭᐅᓗᑭᖕᖏᑐᑦ. ᐆᑦᑑᑏᑦ: ᐸᑏᓰᑦ ᐅᕐᓱᒧᑦ ᐃᒐᓯᒪᔪᑦ ᐯᒍᓗᑎᒃ, ᐃᒻᒧᖁᐊᖅ ᖃᔫᑦᓱᓂ ᓲᑉᐸᖅ, ᐅᑲᓕᐅᑉ ᓂᕿᖓ ᓂᐊᖂᔭᐅᑉ ᐃᑭᐊᕐᒥᑕᖓ, ᐊᓯᖏᓪᓗ. - ᐳᐃᒍᕐᑌᓕᔪᑦ:
quand je vais au marché, je mets dans mon p’tit panier….
[Source: Bien Grandir, Novembre 2011]
